Ֆաթուլլահ Գյուլենը դարձյալ անիծել է Թուրքիայի իշխանությունը

Արդի իսլամի քարոզիչ Ֆեթուլլահ Գյուլենը հերթական անգամ անիծել է Թուրքիայի ներկայիս իշխանությունը:

Ինչպես հաղորդում է «Արմենպրես»-ը՝ վկայակոչելով թուրքական ԶԼՄ-ները, Գյուլենը թուրքական իշխանություններին մեղադրել է իր շարժման հետևորդ ձեռնարկատերերի և չինովնիկների չհիմնավորված ձերբակալությունների, իսկ թուրքական իշխանամետ ԶԼՄ-ներին՝ կառավարության օգտին աշխատելու մեջ:

Բացի այդ, Գյուլենը թուրքական կառավարությանն ու նախագահ Ռեջեփ Թայիփ Էրդողանին մեղադրել է անձեռնահասության մեջ:

73-ամյա Ֆեթուլլահ Գյուլենը նախկինում եղել է Էրդողանի մերձավոր կողմնակիցը և Թուրքիայի ներկայիս նախագահին օգնել է իշխանության գալ: Էրդողանը Գյուլենին մեղադրում է պետական հեղաշրջման փորձի և բարձրաստիճան պետծառայողների հեռախոսային խոսակցությունները զանգվածաբար լսելու գործը կազմակերպելու մեջ, որոնց մի մասի վերծանումն օգտագործվել է 2013 թվականի դեկտեմբերի 17-25-ին Թուրքիայում Էրդողանի որդու, դստեր, փեսայի և կառավարության 4 անդամների մասնակցությամբ մեծածավալ կոռուպցիոն գործողությունների բացահայտման համար: Էրդողանը հայտարարել էր, որ դ րա ետևում կանգնած են ԱՄՆ-ում վտարանդի Ֆեթուլլահ Գյուլենի հետևորդները, որոնք ցանկանում են տապալել իր կառավարությունը: Էրդողանի հանձնարարությամբ աշխատանքից հեռացվել կամ ձերբակալվել են այդ կոռուպցիոն սկանդալը բացահայտած հազարից ավելի փաստաբաններ, դատախազության և ոստիկանության աշխատակիցներ: Այսպես կոչված, «գյուլենականների» հետապնդումները Թուրքիայում շարունակվում է այժմ ևս:

«Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաև նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի և ժողովրդավարության համատեղելիություն: