Հանրահավաքն ավարտվեց Ազատության հրապարակում, մեկնարկեց երթը (ուղիղ միացում)

21:10

Այս պահին Ազատության հրապարակում ավարտվեց ի պաշտպանություն «Սասնա ծռերի» կազմակերպված հանրահավաքը և մեկնարկեց երթը:

Երթն անցնելու է Մաշտոցի պողոտայով, Խորենացի փողոցով և եզրափակվելու է Արշակունյաց պողոտայի սկզբնամասում՝ ՔԿՀ-ի մոտ։

Նշենք, որ երթի մասնակիցների պահանջը նույնն է. պատշաճ բուժօգնություն անազատության մեջ գտնվող՝ «Սասնա ծռեր» խմբի վիրավորված անդամների համար:

Նշենք նաև, որ հաջորդ հանրահավաքը կայանալու է հաջորդ ուրբաթ օրը։ Ինչպես նշեց Ալեք Ենիգոմշյանը՝ «Սասնա ծռեր» խորհուրդը որոշում է կայացրել հանրահավաքներ անել շաբաթը մեկ, այլ ոչ ամեն օր։

21:03

Քիչ առաջ Հիմնադիր խորհրդարանի անդամ Ալեք Ենիգոմշյանը իր ելույթում կոչ արեց Անդրեաս Ղուկասյանի

«ՀՀ ցանկացած քաղաքացի անելիք ունի, և դու բոլորին համահավասար ունես անելիք: Կոչ եմ անում դուրս գալ հացադուլից և միանալ միասնական պայքարին»,- նշեց Ալեք Ենիգոմշյանը:

20:40

Ռեժիսոր Գայանե Գասպարյանն ղարաբաղցիներին կոչ արեց հեռանալ Երևանից ու գնալ Ղարաբաղ, ինչը վրդովեցրեց ցուցարարներին: Նրա ելույթն ընդհատեցին և անջատեցին բարձրախոսը:

«Մարդ չի մնացել Ղարաբաղում, հարգելի ղարաբաղցիներ, մեծից փոքր լքեք Երևանը, թասիբ ունեցեք ու գնացեք Ղարաբաղ: Գնացեք, պահեք ձեր երկիրը: 10 հազարով երևանցի տղաների գլուխը դրեցինք Ղարաբաղի համար ոչ թե որ դուք թողնեիք գնայինք, այլ մնայիք ու պահեիք»,- նշեց Գայանե Գասպարյանը:

20:07

Այս պահին Ազատության հրապարակում մեկնարկել է հանրահավաք ի պաշտպանություն «Սասնա ծռեր» խմբի անդամների:

Հանրահավաքի կազմակերպիչները մեկնարկին հայտարարեցին, որ ելույթներից հետո երթ կլինի դեպի Դատապարտյալների հիվանդանոց՝ պահանջելու պատշաճ բուժօգնություն անազատության մեջ գտնվող, «Սասնա ծռեր» խմբի վիրավորված անդամների համար:

Ուղիղ միացումը՝ Ազատություն ռ/կ-ի