Բռնապետության դեմքը. դատավոր Մելիք-Սարգսյանն ընդդիմադիր լինելը նույնացնում է հանցագործության հետ

Հուլիսի 29-ին Սարի Թաղում ձերբակալված գործիչներին մեկուսացնելու շարժառիթները բացառապես քաղաքական էին: Տրամաբանական ու կայացված քաղաքական որոշման հետևանք համարվեց Արմեն Մարտիրոսյանի, Դավիթ Սանասարյանի և Հովսեփ Խուրշուդյանի գրավի դիմաց ազատ արձակումը:

Թվում էր` այդպես պետք է լինի նաև Անդրիաս Ղուկասյանի պարագայում, սակայն նրա հարցում օրինչափությունը չգործեց: Պատճառները կարող են տարբեր լինել: Ասենք, գործել է անհատական վերաբերմունքը և իշխանություններն անհանդուրժող են գտնվել քաղաքագետի հանդեպ, ով վերջին տարիներին հանդես է եկել հրապարակային արմատական կոչերով:

Գուցե առկա է երկրորդ պատճառը ու դա այն է, որ Անդրիասի պարագայում էական է դիտվել նրա անկուսակցականությունն ու քաղաքական տանիք չունենալը: Վերջին հաշվով` Արմեն Մարտիրոսյանը, Դավիթ Սանասարյանը և Հովսեփ Խուրշուդյանը «Ժառանգություն» կուսակցության անդամներ են: Խորհրդարանական կարգավիճակ ունեցող կուսակցության, որը նաև միջազգային մի քանի կառույցների անդամ է: Հայտնի է, որ մեր իշխանություններին ավելի շատ անհանգստացնում է ոչ թե մեր հասարակության, այլ` միջազգային հանրության արձագանքը:

Չի բացառվում նաև, որ իշխանությունները փոխել են քաղաքական որոշումը, որովհետև «Սասնա ծռեր»-ի քաղաքական շարժումն ուժեղանալու փոխարեն թուլանում է: Օգոստոսի 19-ին Ազատության հրապարակ էր եկել հինգ հարյուր, իսկ երեկ ընդամենը երկու հարյուր մարդ:

Եվ վերջապես կա մի հանգամանք, որ Անդրիասը հաշվի չի առել: Համարյա չորս շաբաթ է նա ՔԿՀ-ում հացադուլ է անում, իսկ իշխանությունները, որպես կանոն, տեղի չեն տալիս կալանավորների հացադուլային վերջնագրերին` մտավախություն ունենալով, որ կալանավորների ու դատապարտյալների շրջանում պայքարի ծայրահեղ մեթոդը պոպուլյար և լեգիտիմ կդառնա:

Սակայն, Անդրիաս Ղուկասյանի Վերաքննիչ բողոքի քննության ժամանակ արտառոց մի իրադարձություն է տեղի ունեցել, որն Հայաստանի նշաձողն իջեցրել է` հավասարեցնելով ասիական բռնապետություններին:

Վերաքննիչ դատարանի դատավոր Գրիշա Մելիք-Սարգսյանը դատական նիստի ժամանակ հարցրել է Անդրիասին, եթե նա ազատ արձակվի արդյոք շարունակելո՞ւ է իր ընդդիմադիր գործունեությունը, ինչին Անդրիաս Ղուկասյանը դրական պատասխան է տվել: Ենթադրվում է, որ այս պատասխանը վճռորոշ է եղել քաղաքագետի խափանման միջոցն անփոփոխ թողելու Վերաքննիչ դատարանի որոշման հարցում:

Եթե դա այդպես է, ապա Վերաքննիչ դատարանը և հատկապես դատավոր Գրիշա Մելիք-Սարգսյանը, նույնացնում են ընդդիմադիր գործունեությունն ու հանցագործությունը:

Բռնապետությունը հենց այնպես չի ստեղծվում: Դրան նպաստում են Մելիք-Սարգսյանի նման կամակատար մարդիկ` վտանգավոր նույնացումներով և նախադեպերով:

Սարգիս Հակոբյան