Գյումրիում սկսվել է ոչ պաշտոնական քարոզարշավը՝ ոչ պաշտոնական, բայց խիստ հրահանգներով

-X օրը առավոտից կանգնած ենք մնալու արևի տակ,-նշում են մի քանի մանկավարժներ, ովքեր մասնակցելու են Գյումրու կենտրոնական հատվածում գտնվող նորոգված փողոցներից մեկի բացմանը...

Մանկավարժներն այնտեղ գնալու են հատուկ հրահանգով՝ իշխանությունների հրահանգով, որպեսզի ստեղծվի գեղեցիկ խաբկանք, թե իրենք կանգնած են վերադասի կողքն ու սատարում են յուրաքանչյուր հարցում...

...թե կանգնած են վերադասի կողքին ու կիսում են նրանց ուրախությունը։

Սա մի սովորական թատրոն է, որին կարելի է ականատեսը լինելը Հայաստանի գրեթե յուրաքանչյուր անկյունում, իսկ այս օրերին այն հատկապես ակնառու է Գյումրիում։

Lurer.com-ի տեղեկություններով Գյումրիում թեպետ ՏԻՄ ընտրությունների քարոզարշավի մեկնարկը պաշտոնապես տրված չէ, սակայն բոլոր կողմերն արդեն գործի են անցել՝ օգտագործելով բոլոր հնարավոր լծակները։

Օրինակ իշխանապատկան մանկավարժները, բալասանյանյան քարոզին զուգահեռ մասնակցելով, նաև ջերմ խոսքեր են շռայլում գործող քաղաքապետի օգտին՝ չմոռանալով ծնողներին ուղղված փոքրիկ սպռավչկաներ անել, որ ճիշտ թեկնածուն հենց Սամվել Բալասանյանն է։

Այս առումով, նման գործելաոճի է անցել նաև Գյումրու մանկավարժական ինստիտուտը, որի ռեկտորի պաշտոնից հեռացավ բհկ-ական Վարդևան Գրիգորյանն ու պաշտոնի նշանակվեց Շիրակի մարզպետարանի արդեն նախկին կրթության բաժնի պետ, ՀՀԿ Շիրակի տարածքային կազմակերպության խորհրդի նախագահ Սահակ Մինասյանը։

Ակտիվ քարոզ է ընթանում նաև «Գյումրու մոր և մանկան ավստրիական հիվանդանոց» ՓԲԸ-ր աշխատակազմի կողմից։ Նշյալ կառույցի գործադիր տնօրեն Աշոտ Կուրղինյանը գլխավորում է ՀՅԴ համամասնական ցուցակը։ Ի դեպ, հիշյալ թեկնածուն մի քանի անգամ նշել է, որ որպես անհատ երբեք չէր առաջադրվի, բայց դե քանի որ մտել են պարի մեջ, պետք է շորորան...

Ի դեպ, ոչ պակաս շորորում ու ակտիվացել են նաև մարզպետարանի աշխատակիցները, սակայն այնտեղ երկակի խաղ է գնում. թեպետ բոլորն ակտիվորեն պաշտպանում են դաշնակցական թեկնածուին, դե մարզպետը կարկառուն ՀՅԴ-ական է, սակայն թաքուն քարոզում են հանրապետականի օգտին, ով այս դեպքում սատարում էր թղթաբանությամբ ոչ, բայց հոգով-սրտով հանրապետական Բալասանյանին։

Գերակտիվ են նաև գալայականները, որոնք այս դեպքում համարվում են առաջատարներից մեկն ու ունեն գովազդվելու մեծ հարթակ՝ դե ԳԱԼԱ-ին է պատկանում համանուն հեռուստաընկերությունը, նաև վերջերս նրանց միացավ ժուռնալիստների «Ասպարեզ» ակումբի խորհրդի նախագահ Լևոն Բարսեղյանը, ասել է թե ավելացավ ևս մեկ մեդիա հարթակ՝ գովազդի լավագույն հարթակը։

Ի դեպ, երևի թե սա էր պատճառը, որ նշված ուժին միացավ նաև «Լուսավոր Հայաստանը»՝ վստահ լինելով, որ Գյումրիում նման ճանապարհով կարող է հաղթող լինել...

Անի Սահակյան