Խելքդ գլուխդ հավաքիր, Արթո′ւր

Ապշած եմ Սմերտի պահվածքով, զարմանում եմ` ի՞նչ տարօրինակ հայտարարություններ է անում:

Կարեն Գրիգորյանի նման քաղաքապետի դեմ թեկնածություն առաջադրելն արդեն իսկ աբսուրդ է: Կարեն Գրիգորյանն այքան շատ աշխատանքներ է կատարել քաղաքում, որ դժվար է ակնկալելը, թե մեր համաքաղաքացիները, նրան թողած, մեկ ուրիշի կընտրեն: Բայց դա թողնենք մի կողմ:

Մարդ է, ուզում է, թող ուժերը փորձի: Իսկ ինչ են նշանակում սխալ, անպատվաբեր արտահայտությունները բարձր համբավ եւ հեղինակություն ունեցող Զորավար Մանվել Գրիգորյանի հասցեին: Լավ Արթուր, ես քեզ չեմ հասկանում' հիշողության կորո՞ւստ ես ունեցել, քեզ փոխե՞լ են, տեղդ այլ մարդ ե՞ն դրել: Մոռացե՞լ ես` ինչ ակնածանքով, հարգանքով, երբեմն' ինչ քծնանքով էիր խոսում Գեներալի մասին: Ես շատ լավ եմ հիշում, որ երբ ես քաղաքապետ էի, դու` ավագանու անդամ, հենց դու առաջարկեցիր Էջմիածնի պատվավոր քաղաքացու կոչման արժանացնել ԵԿՄ վարչության նախագահ, Արցախի հերոս Մանվել Գրիգորյանին: Առաջարկդ միաձայն ընդունվեց:

Քաղաքապետարանի արխիվում հաստատ պահպանվել է տվյալ նիստի արձանագրությունը, որ ստորագրել են ավագանու բոլոր անդամները, դու` ևս:

Բացեք արձանագրությունն ու կտեսնեք, թե ինչ բոցաշունչ ելույթ ունեցավ Թումանյան Արթուրը' գովեստի բառեր չխնայելով Գեներալի հասցեին:

Նիստի տեսագրությունն էլ կարելի է վերցնել-նայել. դժվար պահպանված չլինի:

Մանվել Գրիգորյանը ներողամիտ մարդ է, աստվածավախ, քեզ կների, սակայն, Աստված կարող է չներել: Ի սեր երեխաներիդ, ընտանիքիդ, ուշքի արի Արթուր:

ԷՋՄԻԱԾՆԻ ՆԱԽԿԻՆ ՔԱՂԱՔԱՊԵՏ ԳԱԳԻԿ ԱՎԱԳՅԱՆ