Տնտեսությունը փլուզվում է, բայց աղքատությունը «կրճատվում» է

Նման բան միայն Հայաստանում կարող է լինել, երբ մարդիկ ապրում են թշվառության մեջ, բայց հեռուստատեսությամբ լսում են իրենց կյանքի որակի բարձրացման մասին։ Սա համարվում է գռեհիկ պաշտոնական քարոզչություն, երբ խնդիրը ոչ թե հասարակությանն իրազեկելն է, այլ նրան մանիպուլացնելը։ Իրավիճակի ողբերգականությունը նրանում է, որ նույնիսկ գործող վարչապետն է խոսում տնտեսության ծանր վիճակի մասին, սակայն ԱՎԾ- ն հայտարարում է, թե աղքատությունը 0.2%-ով նվազել է։

Տպավորություն է, որ Կարեն Կարապետյանն ապրում է նոր ռեժիմով, որտեղ ստելն ընդունված չէ, իսկ կառավարության մի շարք օղակներ շարունակում են իներցիաիայով ստել, որովհետև բլեֆը դրված է մեր կառավարման համակարգի հիմքում։ Եթե աշխատաոճային նման կոնտրաստ է, Կարապետյանը պետք է անմիջապես պաշտոնանկ աներ ԱՎԾ պետին։ Բայց Ստեփան Մնացականյանը շարունակում է աշխատել, որովհետև ճշմարտությունը, ըստ երևույթին, Կարապետյանին պետք է այնքան ժամանակ, քանի դեռ նա նկարագրում է նախորդից ստացած ծանր ժառանգությունը։ ԱՎԾ-ի «նկարչությունը» նոր կառավարությանն էլ պետք կգա, երբ հասարակությանը մանիպուլացնելու անհրաժեշտություն ծագի։ Դրա նշաններն արդեն երևում են։

Օրինակ, կառավարությունն ասում է, թե հաջորդ տարվա բյուջեն վերականգնողական է, իրականում, եթե նույնիսկ այդպես է, ապա մենք «վերականգնվում» ենք մի մակարդակի վրա, որն ավելի ցածր է 2013թ.-ի ցուցանիշներից։ 2013 թվականի համեմատ՝ 2017 թվականին ՀՀ քաղաքացները 10%-ով ավելի վատ են ապրելու, որովհետև ՀՆԱ-ի մեջ սպառման մակարդակը 10%-ով նվազելու է:

Սա ոչ թե ընդդիմության չուզողություն է, այլ՝ մասնագիտական հաշվարկ։

Բայց նույնիսկ հաջորդ տարվա 3,2%-ոց աճը, որ կանխատեսում է կառավարությունը, խիստ հարաբերական է։ Սա ընդամենը «պրոգնոզ» է՝ հիմնված այն լավատեսության վրա, որ հաջորդ տարի կդադարի ռուսական տնտեսության անկումը։ Նման լավատեսության հիմքեր չկան, ու թվերն ավելի խոսուն են։ Երկիր մտնող տրանսֆերտների ցուցանիշներով՝ հակառեկորդակիր ենք՝ վերջին տաս տարիների կտրվածքով։ Կենտրոնական բանկի տվյալներով՝ տարվա առաջին ինը ամիսներին ֆիզիկական անձանց արտերկրից փոխանցել են 1 միլիարդ 61 միլիոն դոլար: Նման ցածր ցուցանիշ չի գրանցվել անգամ ճգնաժամային՝ 2009թ․-ին և դրան հաջորդած տարում: Տրանսֆերտների 60%-ը բաժին է ընկնում Ռուսաստանին։ Թվերը խոսում են այն մասին, որ Ռուսաստանում տնտեսության գահավիժումը շարունակվում է։ Ողբերգությունն այն է, որ Հայաստանի կառավարությունը զարգացման այլընտրանք չի առաջարկում և հավանական է, որ Հայաստանը կհայտնվի ԵՏՄ «փլատակների» տակ։

Սակայն ամենասարսափելին այն է, որ 2016թ․ առաջին ինը ամիսներին՝ ֆիզիկական անձինք երկրից հանել են 565 միլիոն դոլար ու այս միտումը շարունակվում է նաև կառավարության փոփոխությունից հետո։ Մարդիկ չեն հավատում, որ Հայաստանում իրական պայքար կծավալվի կոռուպցիայի և մենաշնորհների դեմ և իրենց կապիտալը հեռացնում են ավելի ապահով տեղեր։ Այս իրավիճակում՝ նույնիսկ ծիծաղելի է թվում, որ Հայաստանի իշխանությունները փորձում են շահագրգռել արևմտյան կամ արաբ ներդրողներրին։ Ավելի ծիծաղելի է, երբ դատարկվող գյուղերի ֆոնին՝ յուրաքանչյուր շաբաթ օր՝ վարչապետը «դասախոսություններ» է կարդում սահմանային մարզերի հուսահատ գյուղապետերի համար։

Սարգիս Հակոբյան