Ազգային գրապալատի ու Ազգային գրադարանի միաձուլմամբ՝ հաստիքների կրճատում չի նախատեսվում

Ազգային գրադարանի և Ազգային գրապալատի վերամիավորմամբ՝ հաստիքների կրճատում չի նախատեսվում: Այս մասին ԼՈՒՐԵՐ.com-ի թղթակցի հետ զրույցում նշեց Ազգային գրադարանի տնօրեն Տիգրան Զարգարյանն, ով հավելեց նաև, որ եվոպական և ոչ մի երկրում այսօր չի գործում ազգային գրապալատ կոչվածը:

«Եվրոպական ոչ մի երկրում ազգային գրապալատ հասկացություն երբեք չի եղել: Դրանք եղել են ազգային գրադարանների գործառույթները»,- ասաց նա:

Տ. Զարգարյանի խոսքով՝ Ազգային գրապալատը սովետական հասկացողություն է, որը Հայաստանում ստեղծվել է 1922 թվականին՝ երկրում տպագրված ազգային անձեռնմխելի բազմաթիվ օրինակները պահպանելու նպատակով, քանի որ այդ ժամանակ ազգային գրադարան հասկացողություն չկար: «Անկախացումից հետո բոլոր պետություններում այդ պրոցեսն ընթանում է: Առաջինը դա եղավ Վրաստանում ու Մերձբալթյան երկրներում, այնուհետև՝ Ռուսաստանում, որը տվեցին ՏԱՍՍ-ին, իսկ հիմա Հայաստանում»,- մանրամասնեց տնօրենը:

Նա նշեց նաև, որ Ազգային գրադարանները կատարում են այն բոլոր գործառույթները, որոնք որ կատարում են ազգային գրապալատները, հետևաբար կառավարությունը որոշեց Ազգային գրապալատի լիազորությունները տալ Ազգային գրադարանին: «Մատենագիտության կազմում, պարտադիր օրինակի ստացում, և այլն, և այլն… այս բոլոր գործառույթներն այսօր կատարում է Ազգային գրադարանը: Միակ գործառույթը, որը չէր կատարում, դա միջազգային գրքի ստանդարտ համարանիշն էր, որ տալիս ենք թերթերին: Դա ևս կմիաձուլվի Ազգային գրադարանին, որն այսուհետ կունենա նորմալ գործառույթներ: Մնացյալ ամեն ինչը, Ազգային գրադարանն Ազգային գրապալատին զուգահեռ անում էր»,- ասաց նա:

Ճշտող հարցին՝ դա չի հանգեցնի՞ հաստիքների կրճատման՝ տնօրենը հավաստիացրեց՝ ոչ: «Բոլոր հաստիքները փոխանցվելու են Ազգային գրադարանին և որևէ կրճատում չի նախատեսվում»,- ասաց նա:

Ցավոք, մեզ չհաջողվեց կապ հաստատել նաև Ազգային գրապալատի նախագահ Գևորգ Հարությունյանի հետ: Նրա քարտուղարուհին պատասխանեց, որ նա տեղում չէ:

 Արմինե Եփրեմյան