Նոր ընտրությունները՝ հին դեմքերով...

«Ազատ դեմոկրատներ» կուսակցությունը խոստանում է խորհրդարան գնալ՝ երկիրը դեպի Արևմուտք տանելու նպատակով: Այս քաղաքական ուժի նախընտրական ծրագիրը բաղկացած է 10 հիմնական կետից, որոնց մեջ կենտրոնական տեղ է զբաղեցնում պայքարը ստվերային շրջանառության դեմ. պաշտոնական տվյալներով, Հայաստանում ստվերային շրջանառությունը 30% է կազմում։ Հեղինակները վստահ են՝ եթե ստվերը վերացվի, հնարավոր կլինի կրկնապատկել առողջապահական, կրթական ու պաշտպանական ծախսերը։

Կուսակցության ծրագրում ընդգրկված է նաև կոռուպցիայի դեմ պայքարը, որի արդյունքում հնարավոր է պետբյուջե մուծել մոտ 600 միլիոն դոլարից մինչև 1 մլրդ դոլար։ Հաջորդ կետով նախատեսվում է գործազրկությունը մինչև 10․4%՝ իսկ աղքատության մակարդակը' 30%-ից մինչև 15% նվազեցնել։ Ծրագրով նախատեսվում է նաև բարեփոխել բանակն ու այն ապահովել նորագույն սարքավորումներով, խաղաղ ճանապարհով լուծել Ղարաբաղյան հակամարտության խնդիրը՝ Արցախի հանրապետության անկախությունը ճանաչելու միջոցով:

Դաշինքը խոստանում է 5 տարվա ընթացքում կրկնապատկել կրթության ու գիտության ոլորտին հատկացվող գումարները, ստեղծել նորմալ պայմաններ՝ փոքր ու միջին բիզնեսի զարգացման համար, հարկային արտոնություններ ներդնել ու իրականացնել մի շարք բարեփոխումներ սահմանամերձ շրջաններում, նաև՝ ներդնել երեխաների խնամքի համար նպաստ՝ առաջին երեխայի համար՝ 1․5 մլն դրամ, իսկ 2, 3, 4-րդ երեխաների համար՝ 2-ական միլիոն, 5-րդ երեխայի համար՝ 3 մլն դրամի չափով։

Ապրիլի 2-ին կայանալիք խորհրդարանական ընտրություններին մասնակից ինը կուսակցությունների և դաշինքերի ցուցակներում արևմտամետ գործիչների պակաս չի զգացվում։ Օրինակ՝ «Օհանյան-Րաֆֆի-Օսկանյան» և «Ելք» դաշինքներում, հատկապես՝ ցուցակների առաջին հորիզոնականներն զբաղեցնող գործիչներից՝ նախկին վարչապետ Արամ Սարգսյանը, նախկին արտգործնախարարներ Րաֆֆի Հովհաննիսյանն ու Վարդան Օսկանյանը, պատգամավոր Էդմոն Մարուքյանը, Հայաստանի ապագան տեսնում են Եվրոպական և Եվրաատլանտյան տիրույթում։ Արևմտամետ անհատներ կան նաև ՀՅԴ-ի և անգամ իշխող ՀՀԿ-ի ցուցակում, սակայն միակ ուժը, որին կարելի է տալ արևմտամետ անվանումը առանց վերապահումների, «Ազատ դեմոկրատներ» կուսակցությունն է։

Կուսակցությունը հիմնադրվել է 2011 թվականի մայիսին։ Մեկ տարի անց «Ազատ դեմոկրատները» «Ժառանգություն» կուսակցության ցուցակով մասնակցեցին խորհրդարանական ընտրություններին, կուսակցության հիմնադիր և ղեկավար Խաչատուր Քոքոբելյանը և անդամներից՝ նախկին արտգործնախարար Ալեքսանդր Արզումանյանը, դարձան պատգամավորներ։ Ամիսներ անց՝ 2013-ի փետրվարին, Քոքոբելյանը դուրս եկավ «Ժառանգություն» խմբակցությունից։ Ի վերջո, մինչև 2017-ը, խմբակցության բոլոր անդամները հեռացան: Վերջինը Զարուհի Փոստանջյանն էր։ Բայց հեռացողներ եղան նաև «Ազատ դեմոկրատներ» կուսակցությունից, այդ թվում՝ Ալեքսանդր Արզումանյանն ու փոխնախագահ Անուշ Սեդրակյանը։

Ընտրություններում «Ազատ դեմոկրատներ»-ին միացել է նախկին վարչապետ Հրանտ Բագրատյանը՝ իր «Ազատություն» կուսակցությունով։ Համամասնական ցուցակը գլխավորում են Քոքոբելյանն ու Բագրատյանը, ընդ որում՝ նախապես պայմանավորվածություն է ձեռք բերվել, որ հաղթելու դեպքում կուսակցության վարչապետի թեկնածուն լինելու է Բագրատյանը։

Համամասնական ցուցակի երրորդ և չորրորդ տեղերում են Ազգային ժողովի նախկին պատգամավորներ և «Ժառանգություն»-ից հեռացածներ, բայց «Ժառանգություն»-ը մարմնավորողներ Ստյոպա Սաֆարյանն ու Անահիտ Բախշյանը։ Սաֆարյանին կարելի է դասել Հայաստանում ամենաարևմտամետ գործիչների շարքը։

«Ազատ դեմոկրատներ»-ի համամասնական ցուցակում ընդգրկված են նաև նախկին փոխոստիկանապետ Մասիս Այվազյանը, նախկին պատգամավոր, «Օրինաց երկրից» հեռացած Գագիկ Բաղդասարյանը։ Առաջին տասնյակում ընդգրկված է նաև Մասիս Այվազյանի որդին՝ Նարեկ Այվազյանը, ում անունը հայտնի դարձավ «Էլեկտրիկ Երևանի» օրերին։ Ցուցակում 17-րդը կրկին «Էլեկտրիկ Երևանցի» Վաղինակ Շուշանյանն է։ Ցուցակի 21-րդ հորիզոնականում է Քոքոբելյանի եղբայրը՝ Վաչիկ Քոքոբելյանը։

Ցուցակում 12-րդը տեղ է տրվել երկար տարիների նախկին ԱԻՄ-ական, այսօր անկուսակցական, խորհրդարանի նախկին պատգամավոր Ներսես Զեյնալվանդյանին։

«Ազատ Դեմոկրատները» փորձում են օգտագործել հանրավոր ամեն միջոց, որպեսզի հանրության առջև ներկայանան որպես ինքնուրույն ու ինքնաբավ քաղաքական ուժ, իսկ եթե դա չստացվի, ապա գոնե պատրանք ստեղծեն հասարակության աչքերում, որ իրենք այևս քաղաքական դիակ չեն: Չնայած «Ազատ դեմոկրատները» չեն ներկայացրել ազգային փոքրամասնությունների ցուցակ, սակայն համամասնական ցուցակում ընդգրկել են ոչ հայկական ազգանունով երկու աղջիկների՝ Լուսինե Զակալաշվիլի և Դիանա Կիտյուկովա։

Բոլոր ինը ուժերից ամենակարճ ընտրական ցուցակը ներկայացրել է հենց «Ազատ դեմոկրատներ» կուսակցությունը՝ 101 մարդ, սակայն մյուս կողմից՝ այս ցուցակը ընդգրկում է շատ երիտասարդ գործիչների ու կանանց։ Հաշվի առնելով, որ այս կուսակցությունը կարող է ֆինանսական միջոցներ ներդնել լավ և ընդգրկուն քարոզարշավ տանելու համար, որ այս ուժին քվե կտան Հայաստանը ԵՏՄ-ում և ՀԱՊԿ-ում չտեսնող քաղաքացիները, և հաշվի առնելով, որ ընտրական ցուցակը բավական ներկայացուցչական է, կարելի է սպասել, որ «Ազատ դեմոկրատները» կհաղթահարեն խորհրդարան մուտքի 5 տոկոսի արգելքը։

 Ստելլա ԽԱՉԱՏՐՅԱՆ