ՀՔԾ-ն արձագանքել է ԼՈՒՐԵՐ.com-ի հրապարակմանը

Հատուկ քննչական ծառայությունը հերքում է մարտի 1-ի գործով քննչական խմբի նոր ղեկավարի վերաբերյալ մամուլում տեղ գտած լուրերը։

«Վաղինակ Ջանազյանի կինը երբևէ ՀՀ ֆինանսների նախկին նախարար Վարդան Խաչատրյանի դուստրը չի եղել` պետք չէ ընտանիքներում կռիվ գցել: Նրա աները կենսաթոշակառու է և պետական պաշտոն երբեք չի զբաղեցրել: Ընտանիքի անդամները ոչ մի կապ և առնչություն չունեն «Անի» կաթնամթերքի գործարանի հետ, տնտեսական գործունեությամբ չեն զբաղվել ու չեն զբաղվում: Վաղինակ Ջանազյանը 2007թ. հոկտեմբերի 23-ին Աբովյան-Կորյուն խաչմերուկում տեղի ունեցած միջադեպի վերաբերյալ քրեական գործ չի քննել: Թող շատերին հայտնի լինի, որ մարտի 1-ի գործով քննչական խմբի նոր ղեկավար, ՀԿԳ ավագ քննիչ Վաղինակ Ջանազյանն անցել է քննչական աշխատանքի մեծ դպրոց»,- ասվում է ՀՔԾ-ի հաղորդագրությունում:

ԼՈՒՐԵՐ.com-ը երեկ տեղեկություն էր տարածել, որ Վահագն Հարությունյանի փոխարեն «Մարտի 1»-ի գործով քննչական խմբի նոր ղեկավար նշանակված ՀՔԾ քննիչ Վաղինակ Ջանազյանի հորն է պատկանում կաթնամթերք արտադրող եւ շուկայում բավականին ազդեցիկ դիրք ունեցող «Անի» կաթնամթերքի գործարանը:

Տեղեկացրել էինք նաեւ, որ Վաղինակը ՀՀ Ֆինանսների նախկին նախարար, այժմ Սերժ Սարգսյանի խորհրդական, ՀՀԿ-ական Վարդան Խաչատրյանի փեսան է, այսինքն` նրա դստեր ամուսինը: Որոշ թերթեր արտատապել էին այս ինֆորմացիան` մեզ հղում անելով, որից հետո ՀՔԾ-ն հանդես է եկել պարզաբանող հայտարարությամբ:

Վարդան Խաչատրյանի փեսայի, Անի կաթնամթերքի արտադրության սեփականատիրոջ որդու անունը եւս Վաղինակ է, եւ նա աշխատում է ՀՔԾ-ում: Շփոթը հենց այստեղից է առաջացել, որի համար հայցում ենք մեր ընթերցողների, ինչպես նաեւ Ջանազյանի ընտանիքի ներողամտությունը: