Արդարացվա՞ծ է Քաղաքացիական և Վարչական դատարանների միասնական գործունեությունը

«Արդարացվա՞ծ է արդյոք Քաղաքացիական և Վարչական դատարանների միասնական գործունեությունը և ի՞նչ խոչընդոտներ կլինեն, եթե այդ դատարններն առանձին աշխատեն»։ Այսօր ԱԺ-ում այսպիսի հարց ուղղեց «Ծառուկյան» դաշինքի պատգամավոր Լուիզա Սարգսյանը՝ Վճռաբեկ դատարանի նախագահի թեկնածու Երվանդ Խունդկարյանին։

Վերջինս նշեց, որ 2015 թվականի սահմանադրական փոփոխություններից հետո իրավաբանական հանրությունը  բավանականին ակտիվ քննարկել է այդ հարցը՝ արդյո՞ք արդարացված է միասնական գործունեությունը և քննարկումներից հետո որոշվել է որ դատարանները պետք է լինեն միասնական։

«Ի տարբերություն քրեական արդարադատության ոլորտի՝ Քաղաքացիական և Վարչական ոլորտների սահմանակից հարցերն այդ երկու բնագավառներում բավականին հեռու են, իսկ Քաղաքացիական և Վարչական դատավարության  բնագավառներում վիճելի հարցերը բավականին մոտ են, որոնք են, օրինակ, ժառանգության հետ կապված հարցերը, աշխատանքային հարաբերություններից բխող առարկայական ընդհատության հետ կապված խնդիրները, ապրանքային նշանների վեճերի հետ կապված խնդիները»,-նշեց Խունդկարյանը։

Նա նկատեց, որ առանձնացված պալատ ստեղծելու պարագայում կարող է ստեղծվել մի իրավիճակ, որ հնարավոր է երկու պալատների դիրքորոշումները միմյանց հակասեին և խաթարվեր Վճռաբեկ դատարանի բուն գործունեությունը։

«Նման պայմաններում մենք ստիպված պետք է ստեղծեինք մեկ այլ մարմին, որը պետք է լուծեր երկու պալատների միջև առաջացած վեճերը։ Իմ կարծիքը մնում է նույնը․ պալատների բաժանման անհրաժեշտությունը ես չեմ տեսնում։ Որոշակի փոփոխություն անելու համար պետք է ունենանք օրենսդրական հիմքեր։ Սահմանադրական փոփոխությունից հետո մենք չունեցանք հիմք, որ այն պալատը, որը գործում է միասնականորեն, և, իմ կարծիքով՝ հաջողել է իր աշխատանքում՝ բաժանվի երկու առանձին պալատների»,-ավելացրեց Խունդկարյանը։