«Հավի ձվից խոշոր» կարկուտը հողին է հավասարեցրել քարինջեցիների բերքը, վնասել տներն ու մեքենաները (լուսանկարներ)
Հասարակություն
Սեպտեմբերի 10–ին կեսօրից հետո 10 րոպե տևած ուժեղ կարկուտը հողին է հավասարեցրել Լոռու մարզի Քարինջ գյուղի պտղատու ծառերի ու բանջարանոցների բերքը: Վնասվել են տների տանիքները, մեքենաներ, ընտանի կենդանիները:
ԼՈւՐԵՐ.com-ի թղթակցի հետ զրույցում Քարինջի համայնքապետ Նորիկ Մկրտումյանը ցավով նշեց, որ գյուղացիները մեծ վնասներ են կրել.
«16:30-ի սահմաններում ուժեղ կարկուտ տեղաց: Գյուղացիների հիմնական մասը տուժել է. այն գյուղացիների տները, որոնք 30-40 տարվա տանիքներ ունեին՝ 100 %-ով վնասվել են: Այս տարի այնքան էլ բերքառատ տարի չէր, հիմա էլ կարկուտն ամբողջությամբ հողին հավասարեցրեց ընկույզը, խնձորը: Վնասվել են նաև մեքենաները, մեծ թվով հավեր ու բադեր են սատկել»,- ասաց Մկրտումյանը:
Գյուղապետը նշեց՝ խնդրով դիմել են մարզպետարան՝ տուժած քաղաքացիների վնասը փոխհատուցելուխնդրանքով. «Հիմա մենք հանձնաժողովով արձանագրություն ենք կազմում և մեր եզրակացության արդյունքներից հետո մարզպետարանից կգան, ստուգում կանցկացնեն, որից հետո նոր կխոսենք փոխհատուցման մասին»:
Քարինջի գյուղապետը զարմացած էր՝ նման բան չէին տեսել. «Գյուղի մեծահասակներն էլ են խոսում. նման կարկուտ երբևիցե չի եղել: Հավի ձվից խոշոր կարկուտ էր»,- ընդգծեց համայնքապետը:
Սոնա Հարությունյան
ՈՒՂԻՂ ԵԹԵՐ
Ամենադիտված 
Ծեծկռտուք Մոսկվայի ռեստորաններից մեկում՝ հայտնի գործարարի և «Դոն Պիպոյի» միջև․ վերջինս թիկնապահի հետ փախուստի է դիմել (տեսանյութ)
