2 տարվա ընթացքում շուրջ 20 միլիարդ դրամի խնայողություն ունեցանք. նախկին նախարար Արթուր Գրիգորյան

Քաղաքական 4 Դեկտեմբեր, 2018 19:56

ԼՈւՐԵՐ.com-ը զրուցել է ԲՀԿ համամասնական ցուցակում 3-րդ հորիզոնականը զբաղեցնող Արթուր Գրիգորյանի հետ:

Գրիգորյանը 2010- 2012 թթ. զբաղեցրել է Աշխատանքի և սոցիալական հարցերի նախարարի, այնուհետև, 2018 թվականին, կարճ ժամանակով՝ Էներգետիկ ենթակառուցվածքների և բնական պաշարների նախարարի պաշտոնը:

-Պարո՛ն Գրիգորյան, ի՞նչ է պետք մեր երկրին հեղափոխությունից հետո, ի՞նչ ակնկալիքներ մարդիկ ունեն նոր իշխանություններից:

-Այս պահին խիստ անհրաժեշտություն է համատարած համերաշխությունը: Առանց համերաշխության՝ սև ու սպիտակներով՝ մենք որևիցե հարց չենք լուծելու ոչ մի ոլորտում: Ավելի է խորանալու այս անդունդը, և որևիցե զարգացում չի լինելու:

Մարդկանց սպասելիքների մասով՝ կարող եմ ասել, որ պետք է ՀՀ քաղաքացին վերջապես հասկանա, որ ինքն արդեն արել է իր քայլը, հիմա պետք է համբերությամբ սպասի պատասխան արդյունքի: Համբերության առումով շատ թույլ ենք, հեղափոխության արդյունքը միայն ժամանակի ընթացքում պետք է ակնկալենք:

-Քաղաքական հեղափոխությունը կատարվեց, հիմա շատ է խոսվում տնտեսական հեղափոխության մասին, ո՞վ և ինչպե՞ս պետք է այն անի:

-Շատ կարևոր է, թե ովքեր են անելու տնտեսական հեղափոխությունը, քանի որ դրա համար նախևառաջ հարկավոր է կադրային լրջագույն բազա ունենալ:

Տնտեսությունը կարգավորող օղակներում կադրերը պետք է պլանավորեն առնվազն առաջիկա տասը տարին, օրինակ, կանխատեսեն՝ ինչպիսի մարտահրավերներ են սպասվում աշխարհում և, մասնավորապես, Հայաստանում: Մարդիկ են պետք, ովքեր գոնե պատկերացում ունեն՝ ինչ քայլեր պետք է ձեռնարկել, որպեսզի երկրում տնտեսությունը զարգանա: Սխալ է, թե երկրին անհրաժեշտ են միայն ներդումներ, քանի որ դրանք ոչ միայն կարող են տնտեսությունը զարգացնել, նաև կարող են վնասել:

Տնտեսական հեղափոխությունը պետք է սկսել հետ մնացած կրթական համակարգից: Եթե մենք տնտեսական հեղափոխություն ենք ուզում անել, պետք է ունենանք կրթված համակարգ: Ես շատ եմ կարևորում կադրերի պատրաստվածությունը, որոնք ի վիճակի կլինեն մտածելու և իրենց մտածածը կյանքի կոչելու:

-Պարո՛ն Գրիգորյան, նախարար աշխատելու տարիներին կարողացել էիք 20 միլիարդ դրամ խնայել, ինչպե՞ս էր դա Ձեզ մոտ ստացվել:

Մի քանի գործոններ կան, որոնք նպաստել են իմ աշխատած տարիների արդյունավետությանը: Լավագույն օգնությունը փորձս էր, որը ձեռք էի բերել Վերահսկիչ պալատում աշխատած տարիներին: Այնտեղ մի քանի տարիների ընթացքում իմ ղեկավարած վարչության կողմից բացահայտվեցին լրջագույն խախտումներ: Ամենայն մանրամասնությամբ սկսեցի տիրապետել ծրագրերի իրականացմանն ու դրանց արդյունավետությանը: Սոցապ նախարարի պաշտոնը զբաղեցնելիս ինքս իմ առջև խնդիր էի դրել՝ հասկանալ՝ պետական բյուջեի 30 տոկոսը օգտագործող նախարարությունը արդյոք արդյունավե՞տ է ծախսում այդ միջոցները, թե՝ ոչ:

Ես գիտեի, թե հատկապես ինչին պետք է ուշադրություն դարձնել և շատ կարճ ժամանակահատվածում հասկացա մի բան՝ կառավարությունում գործում էին դեռևս 15 տարի առաջվա որոշումներ, իսկ օրենսդրական դաշտը չէր համապատասխանում տվյալ փուլին:

Կառավարության որոշումների փոփոխությամբ, օրենսդրական դաշտի կանոնակարգմամբ կարողացա գտնել այն մութ կողմերը, որտեղ կարող էին անարդյունավետ գումարներ ծախսվել: Երկու տարվա ընթացքում շուրջ 20 միլիարդ դրամի խնայողություն ունեցանք՝ հիմնականում կենսաթոշակների, նպաստների և պետության կողմից ցուցաբերվող տարատեսակ աջակցությունների և սոցիալական ապահովության ծրագրերից:

-ԲՀԿ 3-րդ համարն եք, ի՞նչ հնարավորություններ ունի այս ընտրություններում ձեր կուսակցությունը և Դուք՝ անձնապես:

-Մեր հնարավորությունները մեծ են թե՛ կադրային, թե՛ քաղաքական թիմի մասով: Կան բազմաթիվ պատրաստված կադրեր, որոնք Նոր Հայաստանում անհրաժեշտ են պետական կառավարման ոլորտում: Հեղափոխությունից հետո պետությունը կադրերի խնդիր ունի, որոնք պետք է լինեն ոչ միայն անկաշառ, այլ նաև՝ պրոֆեսիոնալ:

Իմ մասով կարող եմ այսպես ասել՝ անցած ուղիս եղել է հիմնականում գործադիրում, և լավ պատկերացնում եմ գործադիրի խնդիրները: Օրենսդիրում կկարողանամ իմ նախաձեռնություններով առավել արդյունավետ դարձնել գործադիրի աշխատանքը:

-Ի՞նչ կոչով կդիմեք ժողովրդին:

-Կոչ եմ անում կատարել ճիշտ ընտրություն, քանի որ Նոր Հայաստանում այս ընտրությունները իրոք կարևոր են: Մեր ժողովուրդը պետք է ընտրի այն մարդկանց և այն թիմին, որը լավագույնս կկարողանա կատարել տնտեսական հեղափոխություն: Ես կարծում եմ՝ ԲՀԿ-ն՝ Գագիկ Ծառուկյանի գլխավորությամբ, այդ հարցում ամենակարող է և մեր թիմում լավ են պատկերացնում, թե ոնց կարող են տնտեսական հեղափոխությունը ամբողջությամբ ի կատար ածել: