Մեր կուսակցությունը 6 ամիս առաջ ուղղվելու շանս ուներ. Լեռնիկ Ալեքսանյան

ԼՈՒԵՐԵՐ.com-ը քաղաքական ներկայիս իրավիճակի, հավանական ընդդիմության ձևավորման, ՀՀԿ-ի չօգտագործված շանսերի և մի շարք այլ հարցերի շուրջ զրուցել է Հայաստանի Հանրապետական կուսակցության հինադիրներից մեկի՝ ՀՀԿ-ական նախկին պատգամավոր Լեռնիկ Ալեքսանյանի հետ:

Պարո՛ն Ալեքսանյան, նայելով ԱԺ անցած 3 ուժերին, տեսանելի է, որ միայն դե յուրե մենք ունենք ընդդիմություն, իսկ դե ֆակտո չունենք, մի՞թե սա խնդիր չէ:  

-Չնայած այս ամենին, չեմ կարծում, որ նոր խորհրդարանում ընդդիմություն չի լինելու: Ընդդիմությունը ծնվում է, իսկ արհեստականները միշտ էլ շատ են լինում: Ներկայիս իշխանությունը պայքարի ավելի շատ առիթ ունի և նրան ավելի շատ կարող են քննադատել այն քաղաքական ուժերը, որոնք նպաստել են ներկայիս ուժին՝ իշխանության գալու համար, նույն գաղափարի շուրջ հավաքվածները չեն լինելու՝ «Սասնա Ծռերը», «Լույսը» և նման այլ ուժերն են լինելու։ Նրանց միջից է արմատական ընդդիմություն ձևավորվելու։ 

Իսկ ո՞րն է ընդդիմության դերը, և ինչպիսի՞ գործառույթ է այն իրականացնում։

-Ընդդիմության դերը շատ կարևոր է, նույնիսկ իշխանությունից է կարևոր։ Իսկ այն ձևակերպումները, թե ընդդիմությունը անպայման պետք  է իշխանություն դառնա, չեմ ընդունում, այն պետք է բալանսավորող ուժ լինի։ Ընդդիմությունը հասարակության դժգոհ շերտերի առաջնորդը պետք է լինի, և եթե քաղաքական անցյալ ուժերը ժողովրդի մեջ չունեն վստահություն, ապա նրանք չեն էլ կարող  կարգին ընդդիմություն լինել։ Ընդդիմությունը մենակ այն չէ, որ քննադատեն ու վերջ, նաև նրա համար է, որ հասարակության ցանկությունները բարձրաձայնեն։ Ես համոզված եմ՝ այդ ընդդիմությունն արդեն իսկ նշմարվում է և ավելի ուժեղ է լինելու, քան Հանրապետական կուսակցությունը, ՀԱԿ-ը կամ Դաշնակցությունը կարող էր լինել։

Պարո՛ն Ալեքսանյան, Ձեր խոսքից նկատելի է դառնում, որ Ձեր քաղաքական ուժն արդեն սպառված եք համարում, քանի որ, ինչպես նշում եք՝ հանրապետականները քննադատելու ո՛չ իրավունք ունեն և ո՛չ էլ հնարավորություն, որտե՞ղ եք սայթաքել։

-Հանրապետական կուսակցությունը խորհրդարանում չկա, և իրենից է իր իսկ ապագան կախված։ Մեր կուսակցությունն ուներ ուղղվելու շանս դեռ 6 ամիս առաջ՝ ինքնամաքրվելու, իր սխալների համար իրեն քննադատելու, ինքնուրույն ուղղվելու համար, չնայած՝ հիմա էլ ունի այդ շանսը, ամեն ինչ կախված է բռնած դիրքից։ Առաջիկայում համագումար է լինելու և կադրային  փոփոխություններ են սպասվում, տեսնենք՝ ինչ մարդիկ են լինելու ու ինչպես է վերակազմավորվելու ՀՀԿ-ն։ ՀՀԿ-ի համար մեկ քայլը այն է, որ վերականգնի հասարակության մեջ վստահությունը: Այն ուժը, որը մսխել է այդ վստահությունը, նույնիսկ խելացիության հաշվին հաջողությունների չի հասնի։ Մինչև իշխանություններին քննադատելը, նախ պետք դրա բարոյական իրավունքն ունենալ, այսօր մենք ինչքան էլ քննադատենք Նիկոլ Փաշինյանին, միևնույնն է՝ հասարակությունն ընդունում է նրան, նորից եմ կրկնում՝  պետք է նախ ինքնամաքրվենք։ Պետք է վաստակել քննադատելու իրավունքը։

Նորընտիր խորհրդարանում ունենալու ենք 132 պատգամավոր՝ նախկին 103-ի փոխարեն, ինչը արդեն հասցրել է զայրացնել հասարակության մի շերտին՝ «հավելյալ բեռ ՝ պետբյուջեին, 103-ով էլ վատ չենք ապրել» և նմանատիպ այլ ձևակերպումներ են տրվում․․․

-Նման ձևակերպումները ես չեմ ընդունում, քանի որ երկրի մի շարք գերատեսչություններ հարյուրավոր թափուր հաստիքներ ունեն ու 27 պատգամավորի ավել կամ պակաս լինելը բյուջեի վրա էական ազդեցություն չի ունենալու։ Այս դեպքում ես խնայողությունները չեմ ընդունում, քանի որ եթե պետք լինի, ապա 180 հոգանոց խորհրդարան էլ պետք է ունենանք։ Դե, եթե էդպես է, թող 10 հոգանոց սարքեն ու աշխատեն, գործ շատ կա, կարևորը՝ արդյունավետ աշխատեն։

Պարո՛ն Ալեքսանյան, դեկտեմբերի 9-ին կայացած ընտրություններում քվեարկած քաղաքացիների ճնշող մասը ընտրել էր այն երիտարդներին, որոնց նույնիսկ չեն էլ տեսել, չեն ճանաչել, ըստ Ձեզ, ի՞նչն է փոխվել մարդկանց մեջ։

-Հասարակությունն ընտրել է ոչ թե այդ երիտասարդներին, այլ Նիկոլ Փաշինյանին։ Իհարկե, երիտասարդացումը շատ լավ բան է, բայց դա պետք է լինի շարունակական, այլ ոչ թե հեղափոխությունից հետո միանգամից եկած։ Միևնույն ժամանակ, պետք է նաև փորձառություն, ոչ այնքան ԱԺ-ով, որքան որ անհրաժեշտ է կառավարությունում։ ԱԺ-ում էլի կկարողանան սովորել, օրինակներ վերցնել, բայց կառավարությունում անփորձ կադր ունենալը սխալ է, պետք է փորձառու կադրեր պահեն իրենց կողքին։ Այսօրվա երիտասարդ պաշտոնյաները չեն անցել 1994-95 թթ. միջով, միայն լսել ու կարդացել են, դրա համար էլ մակերեսորեն են նայում, պետք են իրենց կողքին մարդիկ, որոնք անցել են դրանց միջով։ 

Մինչև այդ երիտասարդները փորձ ձեռք բերեն, մի՞թե մենք որոշ դժվարությունների առաջ չենք կանգնի։

-Բնականաբար, մի շարք դժվարություններ կլինեն և դժգոհության ալիք կբարձրանա, քանի որ անփորձ նախարարն իր 300 և ավելի աշխատակազմի հետ միասին կարող է գնալ կործանման։ Ինչ խոսք, ավելի լավ կլինի, որ փորձառուները լինեն կառավարությունում, թեկուզ ցածր օղակներում վերապատրաստվելուց հետո։

Հարցազրույցը՝ Արմինե Միքայելյանի