Սիմպոզիում Երեւանում` մտավոր սեփականության իրավունքների մասին

Երեկ Երեւանում տեղի ունեցավ՝ Սիմպոզիում  մտավոր սեփականության իրավունքների մասին՝ ՀՀ  դատախազության աշխատակիցների մասնակցությամբ:

Հայաստանում Եվրոպական միության խորհրդատվական խմբի նախաձեռնությամբ կազմակերպված սիմպոզիումի նպատակն է մտավոր սեփականության իրավունքի պաշտպանության եւ արդյունավետ կիրառման հիմնախնդիրների վերաբերյալ երկխոսության ծավալումը, ինչպես նաեւ մտավոր սեփականության իրավունքների ոլորտում մեկնարկած բարեփոխումների վերաբերյալ իրազեկության մակարդակի բարձրացմանը ՀՀ իրավապահ մարմինների աշխատակիցների շրջանում նպաստելը:

Սիմպոզիումի ընթացքում քննարկվեցին Հայաստանի Հանրապետությունում մտավոր սեփականության իրավունքների, հեղինակային իրավունքին եւ հարակից իրավունքներին, կեղծ եւ հենային ապրանքների վտանգներին վերաբերող հարցեր:

2008թ. սկսած ԵՄ խորհրդատվական խումբն աջակցում է Հայաստանի կառավարությանն իր բարեփոխումների իրականացման եւ համապատասխան միջազգային պարտավորությունների կատարման հարցում: Դրանք մանրամասն ներկայացված են Եվրոպական հարեւանության քաղաքականության շրջանակներում իրականացվող ԵՄ-Հայաստան գործողությունների ծրագրում:

Վերջերս մտավոր սեփականության իրավունքների ոլորտում նշանակալի առաջընթաց է գրանցվել: Մասնավորապես` իրականացվել են օրենսդրական բարեփոխումներ, ստեղծվել է կեղծ ապրանքների հետազոտման կենտրոն, մշակվել մտավոր սեփականության իրավունքների պաշտպանության ռազմավարություն, ձեւավորվել են շահառուների եւ շահագրգիռ կողմերի ու ոստիկանության միջեւ համագործակցության մեխանիզմներ, հաստատվել են  2012 – 2013թթ. համար Թվինինգ ծրագրերը:

Մտավոր սեփականության բնագավառում առաջնահերթ բարեփոխումներն ակնկալվում է իրականացնել սահմանակետերում` մաքսային ծառայություններում եւ քաղաքացիական ընթացակարգերում: Այս նպատակով գլխավոր դատախազության դերը, որպես մտավոր սեփականության իրավունքների պաշտպանությունն ապահովող մարմնի, առանցքային կարեւորություն ունի: