Ամբողջ բեռը՝ վարչապետի ուսերին․ ի՞նչ են անում մյուսները

Նոր խորհրդարանն այսօր ընդունեց Կառավարության ծրագիրը։ Հարցի հիմնական զեկուցողն էր վարչապետ Նիկոլ Փաշինյանը։ Ոչ միայն Կառավարության ծրագիրը, այլև դրա քննարկումը խորհրդարանում տարբեր քննարկումների առիթ տվեց։ Ըստ որոշ կարծիքների՝ թե՛ քննարկումների որակը, թե՛ բովանդակությունն ու խարիզման չէր տարբերվում նախահեղափոխական ժամանակաշրջանից։ Իսկ կառավարության ծրագիրը բնորոշվում էր որպես «կենացների ժողովածու, հակահեղափոխական, բարի մտադրությունների հռչակագիր» և այլ ձևակերպումներով։

Տնտեսագետ Թաթուլ Մանասերյանն էլ ԼՈւՐԵՐ․com-ի հետ զրույցում տեսակետ հայտնեց՝ կառավարության այս ծրագրում թվերը հիմնավորված չեն․ «Այն ինչ կառավարությունը չընդունեց դա ուղենիշներն են, ինչը ինքնանպատակ չէ․ եթե խնդիր է դրվում նպատակն այն է, որ իմանանք տարեցտարի ինչպես ենք մոտենում հիմնադրույթների իրականացմանը։ Ցանկալի է, որ թվերն իրար հետ խոսեն։ Ոչ թե աղքատության հաղթահարում պետք է լինի, այլ նվազեցում, որովհետև որևէ երկրի չի հաջողվել վերացնել աղքատությունը։ Այս առումով տեղեր կա շտկելու, բայց հույս ունենանք, որ ծրագրի հիման վրա ժամանակացույց կմշակվի, որն ավելի կոնկրետ կարտացոլի անելիքներն ըստ ոլորտների, ժամկետների, մեխանիզմների, ինչպես նաև՝ ըստ աղբյուրների, թե ինչի հաշվին պետք է լինի»,- ասաց Մանասերյանը։ 

Համեմատական անցկացնելով այս և նախորդ կառավարության ծրագրերի միջև տնտեսագետը նկատեց՝ մինչև օրս ոչ մի կառավարության ծրագիր վատը չի եղել, բոլորն էլ լավ նպատակներ են հետապնդել, բայց թե որքանով են դրանք ռեալ փորձը ցույց է տալիս՝ մինչ օրս որևէ կառավարություն հաջողության չի հասել և իր առջև դրած նպատակներից ամենակարևորները, որոնցով փորձել է առանձնանալ մյուսներից չի կատարել։

«Ամբիցիոզ ծրագրեր պետք են, բայց դրանք պետք է հիմք ունենան, եթե ոչ ապա որևէ մեկին տպավորելու կարիք չկա։ 5 տարվա ծրագիրը շատերի մոտ է տարակուսանք առաջացնում, հետևաբար պետք է հաշվի առնել այս ընթացքում հնչեցված դիտողությունները։ Գործողությունների ժամանակացույցը կազմելիս ցանկալի է ըստ ոլորտների նշել պատասխանատուներ»,- ասաց նա՝ հստակեցնելով, որ մինչ օրս ձախողումների համար որևէ մեկը պատասխանատվություն չի կրել։

Խորհրդարանում կառավարության ծրագրի քննարկման քառօրյայի ընթացքում տնտեսագետն ականկալում էր ավելի պրոֆեսիոնալ  մոտեցում․ «Ցանկալի էր, որ տարբեր ոլորտների ղեկավարներ ևս մասնակցեին քննարկմանը, թե գիտության, գյուղատնտեսության մասով ինչ է նախատեսվում և ինչպես, ոչ թե ամբողջ բեռն իր վրա վերցներ վարչապետը։ Աննախադեպ էր, երբ վարչապետը բացի մինչև վերջ ներկայացնելուց մասնակցում էր հարցուպատասխանին, սակայն սա դրական է առաջին դեմքի առումով, բայց այդ դեպքում ի՞նչ են անում մյուսները։ Երանի սխալվեմ, բայց այնպիսի տպավորություն ունեմ, որ ներդրումների և տարբեր ծրագրերի մասով ամենամեծ շահագրգռված անձը վարչապետն է։ Մյուս կողմից մտավախություն է առաջանում, որովհետև ամեն ինչ չէ, որ կարող է անել վարչապետը։  Նա պետք է կոորդինացնի այդ օղակների գործունեությունը։ Իսկ թե որքանով են այդ ոլորտների ներկայացուցիչները պատրաստ վերցնելու պատասխանատվություն, այստեղ արդեն բազմաթիվ հարցեր են առաջանում։ Պրոֆեսիոնալներին, ովքեր պատկերացնում են՝ ինչպես այդ ոլորտները տեղից շարժել պետք է հնարավորություն ընձեռվի մասնակցել ծրագրի կատարմանը»,- ասաց նա՝ խոսքը եզրափակելով, որ խորհրդարանում կան մարդիկ, ովքեր առաձնանում են գորշ միջավայրից և նրանց գործելաոճը պետք է վարակիչ լինի մյուս ոլորտների համար։ 

Սոնա Հարությունյան