Քննարկվեց «Կանանց և տղամարդկանց հավասար իրավունքների և հավասար հնարավորությունների ապահովման մասին» ՀՀ օրինագիծը

Այսօր  ԱԺ մարդու իրավունքների պաշտպանության  և հանրային հարցերի մշտական հանձնաժողովի նիստում, Արամ Սաֆարյանի նախագահությամբ, առաջին ընթեցումով քննարկվեց կառավարության հեղինակած «Կանանց և տղամարդկանց հավասար իրավունքների և հավասար հնարավորությունների ապահովման մասին» ՀՀ օրինագիծը, որը ներկայացրեց ՀՀ աշխատանքի և սոցիալական հարցերի փոխնախարար Ֆիլարետ Բերիկյանը:

Նա նշեց, որ օրինագիծն ուղղված է քաղաքացիների, անկախ նրանց սեռային պատկանելիությունից, իրավունքների և ազատությունների ապահովման պետական երաշխիքների հաստատմանը, հասարակական կյանքի բոլոր ոլորտներում կանանց և տղամարդկանց հավասար հնարավորությունների ընձեռմանը, գենդերային հավասարության սկզբունքի լիակատար իրականացման առաջընթացին, սեռի հատկանիշով խտրականության կանխարգելմանը և խտրականության յուրաքանչյուր դրսևորման համար պատասխանատվության ենթարկելու՝ համապատասխան արդյունավետ միջոցների սահմանմանը:

Նշվեց, որ օրինագիծը հիմնված է ՀՀ Սահմանադրության 14.1 հոդվածի դրույթների վրա և նպատակուղղված է՝ «Կանանց նկատմամբ խտրականության բոլոր ձևերի վերացման մասին» ՄԱԿ-ի կոնվենցիայի, Պեկինի 4-րդ համաշխարհային համաժողովի հանձնարարականների, Եվրախորհրդի կանանց և տղամարդկանց իրավահավասարության հանձնաժողովի փաստաթղթերի, ինչպես նաև ՄԱԿ-ի հազարամյակի հռչակագրի պահանջների և ՀՀ միջազգային այլ փաստաթղթերով սահմանված պարտավորությունների կատարմանը:

Հարակից զեկույցով հանդես եկավ հանձնաժողովի նախագահ Արամ Սաֆարյանը. նա առաջարկեց օրինագծի վերաբերյալ կազմակերպել խորհրդարանական լսումներ և լսել շահագրգիռ կողմերի կարծիքները:

Քննարկված օրինագիծը, հանձնաժողովի դրական եզրակացությամբ, կընդգրկվի ԱԺ չորրորդ գումարման տասներորդ նստաշրջանի օրակարգի նախագծում: 
  
Արտակ Դավթյանի նախագահությամբ՝ տեղի ունեցավ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նիստ, որի օրակարգում ընդգրկված չորս օրենսդրական նախաձեռնությունների քննարկումը հեղինակների` ՀՅԴ խմբակցության պատգամավորների  առաջարկով հետաձգվեց: