Եհովայի վկան դատապարտվել է 6 ամսվա ազատազրկման

Այսօր Երևանի Մալաթիա-Սեբաստիա վարչական շրջանի ընդհանուր իրավասության դատարանում կայացել է Տեր Եսայի քահանա Արթենյանի հայցն ընդդեմ «Եհովայի վկա» կազմակերպության անդամ Անդրանիկ Մակվեցյանի:

Մակվեցյանը դատապարտվել է 6 ամսվա ազատազրկման: Նա մեղավոր է ճանաչվել Քր. Օր. 143-րդ հոդվածով` հոգեւորականին վիրավորելու, սպառնալու եւ եկեղեցու տարածքում քահանայի օրինական գործունեությունը ոտնահարելու համար:

Հիշեցնենք, որ 2011թ. մայիսի 15-ին` ժամը 09:00-ի սահմաններում, «Սուրբ Երրորդություն» եկեղեցու հոգեւոր հովիվ Տեր Եսայի Քահանա  Արթենյանը, նկատելով, որ «Եհովայի վկաներ» կրոնական կազմակերպության անդամներ Ա. Մակվեցյանը եւ Ս. Գրիգորյանը եկեղեցու բակում զբաղված են քարոզչությամբ, մոտեցել է նրանց  եւ խնդրել հեռանալ եկեղեցու տարածքից: Ըստ քրեական գործի նյութերի՝ Ա. Մակվեցյանը եւ Ս. Գրիգորյանը հրաժարվել են հեռանալ եկեղեցու բակից եւ վիճաբանել են  Տեր Եսայի Քահանա  Արտենյանի հետ:

Տեսնելով, որ նրանք չեն հեռանում` քահանան փորձել է բջջային հեռախոսով նկարել  Ա. Մակվեցյանի եւ Ս. Գրիգորյանի` քարոզչությամբ զբաղվելը: Սակայն Ա. Մակվեցյանը թույլ չի տվել քահանային նկարել և նրա ձեռքից վերցրել բջջային հեռախոսը: Քահանան փորձել է ետ վերցնել իր հեռախոսը, բայց  Ա. Մակվեցյանը բռունցքով հարվածել է նրա ձեռքին` սպառնալիքներ հնչեցնելով քահանային: