Նոր օրենսդրության արդյունավետ իրականացում և կիրարկում

Այսօր ԱԺ տնտեսական հարցերի մշտական հանձնաժողովի նիստում, Վարդան Այվազյանի նախագահությամբ, քննարկվեց «Տեխնիկական կանոնակարգման մասին», «Չափումների միասնականության ապահովման մասին», «Ստանդարտացման մասին», «Հավատարմագրման մասին» և «Համապատասխանության գնահատման մասին» ՀՀ օրենքում փոփոխություններ կատարելու մասին» ՀՀ օրենքների նախագծերի փաթեթը, որի նպատակը, ըստ ՀՀ էկոնոմիկայի փոխնախարար Գառնիկ Բադալյանի՝ «ՀՀ կառավարության 2011 թվականի գործունեության միջոցառումների ծրագիրը և գերակա խնդիրները հաստատելու մասին» որոշման, «Հայաստանի Հանրապետության և Եվրոպական Միության միջև խոր և համապարփակ ազատ առևտրի համաձայնագրի բանակցությունների մեկնարկի նպատակով՝ մինչև 2011 թվականի հունիս ամիսը կատարվելիք միջոցառումների ժամանակացույցի» 1-ին կետի կատարման ապահովումն է, համաձայն որի՝ ՀՀ էկոնոմիկայի նախարարությանը հանձնարարված է սկսել ՀՀ կառավարության որոշմամբ հավանության արժանացած ՀՀ որակի ենթակառուցվածքների բարեփոխման ռազմավարության և գործողությունների ծրագրի իրականացումը:

Հայաստանը պետք է ապահովի արտադրանքի անվտանգությանը վերաբերող նոր օրենսդրության արդյունավետ իրականացում և կիրարկում: Այն նախատեսում է որակի ամբողջ ենթակառուցվածքի բարեփոխումների իրականացում՝ այն համապատասխանեցնելով միջազգային օրենսդրությանը, ազգային տնտեսության նոր իրողություններին և մի շարք ոլորտներում առնչվող բարեփոխումներին:

ՀՀ արդարադատության նախարարի տեղակալ Գրիգոր Մուրադյանը ներկայացրեց «2008 թվականի հունվարի 1-ի դրությամբ հարկային հաշվետվություններ չներկայացրած կազմակերպությունները լուծարելու և անհատ ձեռնարկատերերին պետական հաշվառումից հանելու մասին» ՀՀ օրենքում փոփոխություն կատարելու մասին օրինագիծը, որի ընդունման անհրաժեշտությունը պայմանավորված է նրանով, որ առավել դյուրին, արագ և միաժամանակ ոչ ծախսատար դարձվի ՀՀ ԱՆ պետական ռեգիստրի գործակալության կողմից վերը նշված օրենքով նախատեսված անձանց համապատասխան ծանուցման գործընթացը:

Հանձնաժողովը քննարկեց նաև երկրորդ ընթերցման ներկայացված՝ հարկային ոլորտին վերաբերող մի շարք նախագծեր:

Քննարկված բոլոր օրինագծերն էլ ստացան դրական եզրակացություն: