ԱԱԾ կայքի լինգվիստիկ ենթատեքստը

Ինչպես գիտեք, Հայաստանում բոլոր գերատեսչություններն ունեն իրենց կայքերը: Ոմանց դեպքում դրանք բավականին ակտիվ են, ոմանց դեպքում' ոչ: Համարյա բոլոր կայքերը եռալեզու են (հայերեն, ռուսերեն, անգլերեն), սակայն, կան բացառություններ:

Օրինակ՝ Սփյուռքի նախարարության կայքեջը հնգալեզու է, իսկ տնտեսական բլոկի նախարարությանների կայքերը հիմնականում չունեն ռուսերեն տարբերակ (միայն հայերեն ու անգլերեն են): Լեզուների ընտրության տրամաբանությունը պարզ է. հայերենը' տեղացի այցելուների համար, անգլերենը՝ որպես միջազգայնորեն ընդունված լեզու' օտարերկրացիների համար և երբեմն ռուսերենը' տեղացի ռուսախոս ընթերցողի համար:

Սակայն կա մի գերատեսչություն, որը դուրս է այս ամբողջի տրամաբանությունից: Խոսքը Ազգային անվտանգության ծառայության կայքեջի մասին է, որը գործում է հայերեն և ռուսերեն լեզուներով: Այսպիսով, ԱԱԾ-ի կայքը միակն է, որը չունի անգլերեն տարբերակ:

Բացի այդ, առավել հատկանշական է, որ կայքը բացելիս, որպես կանոն, նախ բերում է ռուսերեն տարբերակը և հայերենին անցնելու համար պետք է սեղմել համապատասխան կոճակը: Այս հանգամանքը կարծես թե մատնանշում է, որ առավել են կարևորվում ռուսախոս այցելուները:

Կայքի «միջազգային համագործակցություն» բաժնում, բացի նախկին խորհրդային որոշ հանրապետությունների համապատասխան ծառայություններից (որոնց հետ ԱԱԾ-ն պայմանագիր է կնքել), գրված է, որ ԱԱԾ-ն համագործակցում է նաև ԱՄՆ-ի, Ֆրանսիայի, Իտալիայի, Գերմանիայի, Հունաստանի, Իրանի և մի շարք այլ երկրների հատուկ ծառայությունների հետ, որոնց ներկայացուցիչները ռուսերենին չեն տիրապետում: Այս ենթատեքստում առավել անտրամաբանական է դառնում կայքի անգլերեն տարբերակի բացակայությունը:

Թեև ԱԱԾ-ի կայքում տեղադրված «պատմություն» բաժնում գրված է, որ Հայաստանի հետախուզական ու հակահետախուզական ծառայության սկիզբը դրվել է 1918 թվականի օգոստոսի 13-ին, սակայն 2008 թվականին հայկական թերթերից մեկում գրված էր, որ ԱԱԾ-ի շենքում միջև հիմա կախված են ԽՍՀՄ ԿԳԲ-ի հիմնադիր Ֆելիքս Ձերժինսկու նկարները: Այսինքն՝ կարելի է ենթադրել, որ ԱԱԾ-ում իրենց ծառայության հիմնադիր են համարում հենց Ձերժինսկուն, դրանով իսկ, ըստ էության, նույնացնելով ԱԱԾ-ն ռուսական ԿԳԲ-ի հետ:

Ըստ ամենայնի, ԱԱԾ ղեկավարները այն աստիճանի են իրենց «նույնացնում» ռուսական ԿԳԲ-ի հետ, որ անգլերենն ընկալում են որպես թշնամու լեզու, իսկ թշնամու լեզվով պաշտոնական կայք պահելը պատեհ չէ, իսկ կայքի հիմնական լեզուն, բնականաբար, պիտի լինի ռուսերենը:

Հուսանք, որ ռուսական ԿԳԲ-ի հետ նույնացման ենթադրությունները սխալ են, բայց հակառակ դեպքում մենք գործ ունենք ազգային անվտանգությանը սպառնացող մի ահռելի վտանգի հետ' ի դեմս Ազգային անվտանգության ծառայության:

Դանիել Իոաննիսյան