Հարավային Կովկասը գտնվում է աշխարհաքաղաքական տուրբուլենտության ազդեցության ներքո. Կոպիրկին

Փետրվարի 10-ին Ռուսաստանի Դաշնության դեսպանատանը կայացավ հանդիսավոր ընդունելություն՝ նվիրված Դիվանագիտական աշխատողի օրվան։ Միջոցառմանը ներկա էին ՀՀ պետական իշխանության մարմինների ներկայացուցիչներ, հասարակական գործիչներ և Երևանում հավատարմագրված դիվանագիտական կորպուսի անդամներ։ Այս մասին հայտնում են ՀՀ–ում ՌԴ դեսպանությունից։

Ողջույնի խոսքում ՌԴ դեսպան Սերգեյ Կոպիրկինը ընդգծեց, որ աշխարհը ապրում է խորքային՝ «տեկտոնական» փոփոխությունների շրջան՝ անցում կատարելով բազմաբևեռ համակարգի։ Նրա խոսքով՝ ձևավորվում են քաղաքական, տնտեսական, տեխնոլոգիական և ֆինանսական նոր կենտրոններ, իսկ ապագա համաշխարհային կարգի հիմքում պետք է լինեն իրական հավասարությունը, փոխադարձ հարգանքը և շահերի հաշվառումը։ Այս սկզբունքներով են առաջնորդվում նոր տիպի բազմակողմ միավորումները՝ ՇՀԿ-ն և ԲՐԻԿՍ-ը։

 Դեսպանը նշեց նաև, որ Հարավային Կովկասը գտնվում է աշխարհաքաղաքական տուրբուլենտության ազդեցության ներքո, և այս պայմաններում Հայաստան–Ռուսաստան հարաբերությունները մտնում են նոր՝ փոփոխվող իրողություններին հարմարվելու փուլ։ Առկա մարտահրավերների հաղթահարումը պահանջում է քաղաքական կամք և ռազմավարական մտածողություն՝ երկկողմ համագործակցության ձեռքբերումները պահպանելու և զարգացնելու համար։ Նա հույս հայտնեց, որ այս գործընթացին նոր խթան կտա ՀՀ Ազգային ժողովի նախագահի վերջին այցը Մոսկվա։

Սերգեյ Կոպիրկինը ընդգծեց, որ Ռուսաստանը շահագրգռված է ինքնիշխան, ուժեղ և ինքնաբավ Հայաստանի զարգացմամբ՝ նշելով, որ ԵԱՏՄ-ին անդամակցության 10 տարիների ընթացքում Հայաստանի ՀՆԱ-ն աճել է 2,5 անգամ։

 Եզրափակելով՝ դեսպանը հիշեցրեց, որ Ռուսաստանի և Հայաստանի ժողովուրդների բարեկամությունը ձևավորվել է դարերի ընթացքում՝ համատեղ հաղթանակներով, ստեղծագործ աշխատանքով և սերտ մարդկային կապերով, և այն պետք է պահպանել ու փոխանցել գալիք սերունդներին։