Վարորդների արյան մեջ ալկոհոլի չափաքանակի հնարավոր առկայությունը համապատասխանեցվել է միջազգային չափանիշներին
Իրավունք
Նոյեմբերի 29-ին ՀՀ Ազգային ժողովը շարունակեց արտահերթ նիստի աշխատանքը: ՀՀ ոստիկանության պետի տեղակալ Արթուր Օսիկյանն առաջին ընթերցմամբ քննարկման ներկայացրեց «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» օրինագիծը, որի ընդունումը պայմանավորված է ՀՀ կառավարության հակակոռուպցիոն ռազմավարության ծրագրով:
Մեկ տարի տարբեր շահագրգիռ քննարկումների ենթարկված օրինագծով նախատեսվում է լրացնել ոլորտում առկա բացերը, վերացնել տարբեր վարչական իրավախախտումների համար սահմանված պատժամիջոցների եւ տուգանքների անհամաչափությունները: Ըստ այդմ` որոշ իրավախախտումների դեպքում կնվազեցվեն, իսկ որոշ իրավախախտումների դեպքում էլ կմեծացվեն սահմանված պատժամիջոցներն ու տուգանքները:
Մասնավորապես` պատժամիջոցներ են նախատեսվել նաեւ ոստիկանության համակարգի ծառայողի արժանապատվությանը վիրավորանք հասցնելու եւ ճանապարհային երթեւեկության կանոնների տարբեր խախտումների համար:
Վարորդների արյան մեջ ալկոհոլի չափաքանակի հնարավոր առկայությունը համապատասխանեցվել է միջազգային չափանիշներին:
Պարոն Օսիկյանը տեղեկացրեց, որ ճանապարհային ոստիկանության համակարգում բարեփոխումների իրականացման նպատակով առաջիկայում Երեւանի մի շարք բանուկ հատվածներում տեղադրվելու են տեսախցիկներ, որոնք ֆիքսելու են կատարված ճանապարհային խախտումները, ինչի շնորհիվ ակնկալվում է, որ նվազագույնի կհասցվեն սուբյեկտիվ եւ կամայական մոտեցումները վարորդների նկատմամբ:
Ամփոփիչ ելույթում պարոն Օսիկյանը նշեց, որ բազմաթիվ առաջարկներ ընդունելի են, որոնցից շատերը կընդգրկվեն օրինագծի լրամշակված տարբերակում:
ՀՀ Ոստիկանության պետի տեղակալ Արթուր Օսիկյանն առաջին ընթերցմամբ քննարկման ներկայացրեց «Ոստիկանությունում ծառայության մասին» ՀՀ օրենքում փոփոխություններ եւ լրացումներ կատարելու մասին» օրինագիծը, որի նպատակներից մեկը ժամանակակից չափանիշերին համապատասխանող պրոֆեսիոնալ ոստիկանական հիմքերի ստեղծումն է, որի հիմնական նախապայմանը մասնագիտական բարձր պատրաստվածություն ունեցող կադրերի պատրաստումն է եւ պրոֆեսիոնալ ուսուցումը: Հենց այս նպատակին էլ ուղղված է ներկայացված օրինագիծը:
ՈՒՂԻՂ ԵԹԵՐ
Ամենադիտված 
Ողբերգական դեպք՝ Երևանում
