Օրինագծի ընդունման պարագայում կբարձրանա կոռուպցիայի դեմ պայքարի արդյունավետությունը

Նոյեմբերի 29-ին ՀՀ  Ազգային ժողովը շարունակեց արտահերթ նիստի աշխատանքը: Երրորդ ընթերցմամբ խորհրդարանը քննարկեց «Նույնականացման քարտերի մասին» եւ հարակից օրինագծերի փաթեթը:

ՀՀ արդարադատության նախարար Հրայր Թովմասյանի ներկայացմամբ առաջին ընթերցմամբ պատգամավորները քննարկեցին «ՀՀ քրեական օրենսգրքում փոփոխություններ եւ լրացումներ կատարելու մասին» օրենքի նախագիծը:

Պարոն Թովմասյանի տեղեկացմամբ` օրենքի նախագծով հստակեցվում եւ ամբողջացվում է կոռուպցիոն հանցագործությունների շրջանակը` ապահովելով կոռուպցիայի քրեականացման բնագավառում միջազգային ընդունելի մոտեցումներին համահունչ օրենսդրության ընդունումը:

Մասնավորապես, նախատեսվում է առեւտրային կաշառք տվողի ազատումը քրեական պատասխանատվությունից, եթե տեղի է ունեցել կաշառքի շորթում:

Երկրորդ` նախատեսվում է առեւտրային կաշառք տվողի ազատումը քրեական պատասխանատվությունից այդ մասին իրավապահ մարմիններին կամավոր հայտնելու դեպքում` անկախ կաշառքը վերցնողի կողմից գործուն զղջալու հանգամանքից: Վերացվում է առեւտրային կաշառք ստացողին քրեական պատասխանատվությունից ազատելու դրույթը` վերջինիս կողմից այդ մասին քրեական  գործ հարուցելու իրավունք ունեցող անձանց հայտնելու մասին:  Նաեւ վերացվում է այն դրույթը,  որի համաձայն` հանցակազմի կողմերի գործուն զղջալու դեպքում կաշառքի առարկան վերադարձվում է կաշառք տվողին: Խստացվում են ՀՀ քրեական օրենսգրքի 200-րդ հոդվածի համապատասխան մասերի սանկցիաները` այդ հանցագործությունների համար քրեական պատասխանատվության ենթարկելու առավել երկար վաղեմության ժամկետ սահմանելու նպատակով:

Ըստ ՀՀ արդարադատության նախարարի` օրինագծի ընդունման պարագայում կբարձրանա կոռուպցիայի դեմ պայքարի արդյունավետությունը` նպաստելով  կոռուպցիայի կանխարգելման ուղղությամբ տարվող ՀՀ հակակոռուպցիոն պետական քաղաքականության իրականացմանը:

Օրինագծի ընդունմամբ կկատարվեն նաեւ «Կոռուպցիայի մասին քրեական իրավունքի կոնվենցիայով» նախատեսված միջազգային պարտավորությունները:

ՀՀ արդարադատության նախարար Հրայր Թովմասյանի ներկայացմամբ պատգամավորները քննարկեցին «Կուսակցությունների մասին» ՀՀ օրենքում փոփոխություններ եւ լրացում կատարելու մասին», «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» եւ «ՀՀ քաղաքացիական օրենսգրքում լրացում կատարելու մասին» օրինագծերի  փաթեթը, որով նախատեսվում է բարձրացնել կուսակցությունների ֆինանսավորման թափանցիկությունը եւ ֆինանսական գործունեության վերահսկողությունը: Մասնավորապես հստակեցվում են կուսակցությունների ֆինանսավորման ընթացակարգը եւ ֆինանսական գործունեության վերահսկողության հետ կապված  հարաբերությունները: Սահմանվում են կուսակցություններին կատարվող նվիրատվությունների չափի սահմանափակումներ, ինչպես նաեւ ֆինանսական գործունեության վերահսկողական մեխանիզմներ:

Ըստ հիմնավորման` օրինագծի ընդունումն ու կիրառումը կապահովի կուսակցությունների ֆինանսավորման հստակ եւ թափանցիկ ընթացակարգի իրականացում, ինչպես նաեւ կբացառի կուսակցություններին` օրենքի խախտմամբ նվիրատվություններ կատարելը:

ԱԺ պետական-իրավական հարցերի մշտական հանձնաժողովի դրական եզրակացությունը ներկայացրեց Արա Սիմոնյանը:

«Ժառանգություն» խմբակցության տեսակետը օրինագծերի փաթեթի վերաբերյալ ներկայացրեց խմբակցության անդամ Անահիտ Բախշյանը:  Կարեւորելով ընդդիմադիր քաղաքական ուժերի ներկայությունը պետության կյանքում` տիկին Բախշյանը նկատեց, որ ներկայացված օրինագծերի փաթեթը պետք է ապահովի հավասար հնարավորությունների դաշտ գործող կուսակցությունների համար:

Արտահերթ նիստն աշխատանքը  կշարունակի նոյեմբերի 30-ին: