ՀՀ Սահմանադրական դատարանի հոբելյանական՝ 1000-րդ նիստը

Նոյեմբերի 29-ին ՀՀ սահմանադրական դատարանի հերթական նիստը հոբելյանական էր՝ հազարերորդը։ Խորհրդանշական էր, որ հազարերորդ գործը քննության առնվեց վերաքննիչ վարչական դատարանի դիմումի հիման վրա՝ «Իրավական ակտերի մասին» ՀՀ օրենքի 78-րդ հոդվածի 2-րդ մասի եւ 3-րդ մասի երրորդ պարբերության՝ ՀՀ սահմանադրությանը համապատասխանության հարցը որոշելու վերաբերյալ գործով (Որոշման տեքստը կտեղադրվի ՍԴ կայքում)։

Նիստից հետո, հոբելյանական իրադարձության առիթով, Սահմանադրական դատարանը կոլեկտիվի եւ հյուրերի համար ընդունելություն կազմակերպեց, որին մասնակցում էին ՀՀ վճռաբեկ դատարանի նախագահ Ա. Մկրտումյանը, ՀՀ մարդու իրավունքների պաշտպան Կ. Անդրեասյանը, ՀՀ արդարադատության առաջին փոխնախարար Գ. Մուրադյանը, ՀՀ փաստաբանների պալատի նախագահ Ռ. Սահակյանը, ՀՀ իրավաբանների միության նախագահ Գ. Ղազինյանը, ՍԴ անդամներ, փաստաբաններ, իրավագետներ։

Ներկաներին ողջունեց եւ հակիրճ խոսքով հանդես եկավ ՀՀ ՍԴ նախագահ Գ. Հարությունյանը։

Այն, որ այս հազարերորդ որոշումը կայացվեց վերաքննիչ վարչական դատարանի դիմումի հիման վրա, դատական համակարգում գործառնական փոխհարաբերությունների շատ հետաքրքիր ու նոր խորհրդանիշ դարձավ, կարեւորվեց որոշման եւ՛ կշիռը, եւ՛ հնչեղությունը, եւ՛ նշանակությունը։

Հարությունյանը Սահմանադրական դատարանի անցած ճանապարհը երկու փուլի բաժանեց՝ մինչեւ 2006 թվականը եւ 2006-ից հետո։ Մինչեւ 2006-ը օրենքի սահմանադրականության հարցով սահմանադրական դատարանի քննության առնված գործերը կազմել են 1,3%, 2006-ից այսօր՝ շուրջ 49%։ Ընդ որում, 51 գործերով 55 օրենքների ավելի քան 90 դրույթ ճանաչվել է ՀՀ Սահմանադրությանը հակասող եւ անվավեր։ Միայն քրեական դատավարության օրենսգրքի հետ կապված 35 գործ է քննության առնվել, իսկ քաղաքացիական դատավարության օրենսգրքի հետ կապված՝ 33 գործ։ ՀՀ Ազգային ժողովում Սահմանադրական դատարանի իրավական դիրքորոշումների հիման վրա շուրջ 50 օրենսդրական փոփոխություն ու լրացում է կատարվել։ Սա նշանակում է, որ Սահմանադրական դատարանը լուրջ եւ ծանրակշիռ դերակատարություն ունի օրենսդրական դաշտի սահմանադրականացման ու սահմանադրական իրավահարաբերությունների զարգացման գործում։

Վերջում ՍԴ նախագահը շնորհավորեց գործընկերներին եւ հյուրերին, շնորհակալություն հայտնեց արդյունավետ համագործակցության համար: