Մարդու իրավունքների գրասենյակ ներկայացվող դիմում–բողոքների թիվն ավելացել է 600–ով

Նոյեմբերի 30–ին` լրագրողների հետ հանդիպմանը, Մարդու իրավունքների պաշտպան Կարեն Անդրեասյանը ներկայացրեց մարզեր կատարած այցերի արդյունքները։ Օմբուդսմենն այցելել է 4 մարզ (Սյունիք, Վայոց  Ձոր, Շիրակ, Տավուշ), որտեղ առկա հիմնական խնդիրների փոփոխություն չի նկատել. «Նույն սոցիալական խնդիրները՝ դրանցից բխող խախտումներով»։  

Ըստ օմբուդսմենի ներկայացրած վիճակագրական տվյալների՝ դիմումների թվով մարզերի ցուցակը գլխավորում է Երևանը՝ 802 դիմումով, ապա Կոտայքի մարզը՝ 79, Շիրակը՝ 73, Լոռու մարզը՝ 70 դիմումով։ Դիմումների ընդհանուր թիվը՝ 2.904 դիմում–բողոք, որից 1.307՝ գրավոր, 1597՝ բանավոր։ Դիմումներից 220-ն եղել է ոստիկանությունից, 194-ը՝ դատարաններից, 152-ը՝ աշխատանքի և սոցիալական ապահովության նախարարությունից, 116-ը՝ Երևանի քաղաքապետարանից, 48-ը՝ պաշտպանության նախարարությունից, 38-ը՝ քրեակատարողական հիմնարկներից։

Դրական լուծում տրվել է 1.307 գրավոր դիմումից 123–ի դեպքում, ինչը նախորդ տարվա ցուցանիշը գերազանցում է 73-ով։ Իսկ դիմումների թիվը նախորդ տարվա ցուցանիշը գերազանցում է 600–ով։

Ինչ վերաբերում է մարզային գրասենյակներ բացելու խնդրին, Կ. Անդրեասյանը նշեց, որ, հավանաբար, ամենաուշը փետրվարի մեկին իրենք կունենան վեց մարզային գրասենյակներ։