Սկանդալային «բլոկ». ինչո՞վ են հասցրել աչքի ընկնել Նոր Հայաստանի պաշտոնյաները

Վերլուծական 7 Դեկտեմբեր, 2019 16:30

Նոր Հայաստանում սկանդալներից զերծ չեն մնացել նաև առաջին հայացքից քաղաքականության մեջ չթաթախված և զուտ տնտեսական վարչարարությամբ զբաղվող պաշտոնյաները: Թերևս առաջին նման դեպքը արձանագրվեց այն բանից հետո, երբ Գարեգին Բաղրամյանը նշանակվեց էներգետիկայի և բնական պաշարների նախարար, այնուհետև ՀԾԿՀ նախագահ: Նախ գրվեց, որ Բաղրամյանը ԱԱԾ տնօրեն Արթուր Վանեցյանի հետ ունի խնամիական կապեր, ինչը լրագրողների հետ զրույցում հաստատեց նաև Վանեցյանը՝ ասելով, որ հանդիսանում է վերջինիս բաջանաղը։ Հատկանշական է, որ Բաղրամյանը ներգրավված է «Վեոլիա Ջուր» ընկերության կողմից ՀԾԿՀ անդամներին կաշառելու դեպքով հարուցված քրեական գործում։ Ոստիկանության նախնական տվյալներով, «Վեոլիա Ջուր» ընկերության տնօրեն Կրիստիան Լըֆեն և գործառնական տնօրեն Գոռ Գրիգորյանը, որպես կաշառք, ՀԾԿՀ 7 պաշտոնատար անձանց համար 2017թ․ օգոստոսին գնել են Երևան-Փարիզ-Երևան ուղղությամբ ավիատոմսեր և հոգացել վերջիններիս՝ Փարիզում բնակվելու ծախսերը։ Այդ նպատակով «Վեոլիա Ջուր» ընկերության ղեկավարությունը ծախսել է 12,598,368 դրամ, ինչից հետո, հանձնաժողովի որոշմամբ, խմելու ջրի սակագինը բարձրացվել է 11 դրամով՝ 180 դրամից դառնալով 191 դրամ։

Հաջորդ ոչ պակաս սկանդալային նշանակումը ՏՄՊՊՀ կապված էր ՏՄՊՊՀ նախագահի հետ: Գեղամ Գևորգյանի՝ այս պաշտոնում նշանակվելը միանգամից կապվեց Տիգրան Ավինյանի հետ վերջինիս ունեցած մտերիմ հարաբերությունների հետ: Մինչ այդ էլ Գևորգյանը հասցրել էր հայտնվել սկանդալի կիզակետում ՝ նույն Ավինյանի հետ, չրերի գործարանի հայտնի գործով: Իսկ նշանակումից հետո Գևորգյանը ևս մեկ անգամ հայտնվեց հանրության ուշադրության կենտրոնում՝ բացասական առումով, հայտարարելով, որ մենաշնորհի մեջ առանձնապես վատ բան չկա, և ինքը չի պատրաստվում դրա դեմ պայքարել:

Այս բլոկից ամենաշատը սկանդալների կիզակետում հայտնվել է ՊԵԿ նախագահ Դավիթ Անանյանը: Ամենա առաջինը Նոր Հայաստանում պայթեց հենց ՊԵԿ-ում միլիոնների հասնող պարգևավճարների սկանդալը, որը բացահայտեց պետական համակարգում բյուջեի մսխման ակնհայտ իրողությունը: Դրանից հետո Անանյանին բազմիցս էին մեղադրում համակարգը խնամի-ծանոթ-բարեկամներով լցնելու համար, չնայած, արդարության համար ասենք, որ այս մոլուցքով միայն Անանյանը չէ, որ տառապում էր: Վերջերս էլ մամուլում տեղեկություն տարածվեց, որ ՊԵԿ նախագահ Դավիթ Անանյանի հաշվապահական ֆիրման՝ «Փի-Էյջ-Փի Փարթնըրզ» ՓԲԸ-ն վերապատրաստել է, ոչ ավել, ոչ պակաս, ՊԵԿ «Ուսումնական կենտրոն» ՊՈԱԿ-ին։ Այսինքն՝ Անանյանը պետական բյուջեի հաշվին իր ընկերության համար «գործ է կպցրել»։

Թեև շատ է խոսվում այն մասին, որ Հայաստանի նոր իշխանությունները մաքուր են՝ ի տարբերություն նախորդների, մենք տեսնում ենք, որ սկանդալների մեջ վերջիններս հայտնվում են ոչ պակաս հաճախականությամբ, ինչը հետհեղափոխական Հայաստանի համար շքեղություն է: Դժվար է խոսել տնտեսության զարգացման, տնտեսական գործունեության թափանցիկության մասին, եթե վերոնշյալ բլոկի ղեկավարները պարբերաբար հայտնվում են տհաճ պատմությունների կիզակետում…