ՍԴ-ն պահանջում է չտարածել ապատեղեկատվություն

ՀՀ մարդու իրավունքների պաշտպանի դիմումի հիման վրա՝ ՀՀ սահմանադրական դատարանի՝ 2011 թ.-ի նոյեմբերի 15-ի որոշման ընդունումից հետո մի շարք պաշտոնատար և ոչ պաշտոնատար անձինք փորձում են կարծիքներ ներկայացնել հանրությանն այդ որոշման իրավական հետևանքների մասին, ցավոք, անտեղյակությամբ կամ որոշումը պատշաճ չուսումնասիրելու արդյունքում՝ տարածելով նաև ապատեղեկատվություն։

Նախ՝ սահմանադրական դատարանը ՀՀ քաղաքացիական օրենսգրքի 1087.1-րդ հոդվածը ոչ թե պարզապես ճանաչել է ՀՀ Սահմանադրությանը համապատասխանող, այլ այն որպես այդպիսին է ճանաչվել միայն տվյալ որոշման մեջ արտահայտված՝ իրավական դիրքորոշումներից բխող սահմանադրաիրավական բովանդակության և ՀՀ ստանձնած միջազգային պարտավորությունների շրջանակներում։ Իսկ այդ դիրքորոշումներն ու պարտավորությունները հստակ շարադրված են որոշման մեջ ու պարտադիր են իրավակիրառողների համար։ Իրավակիրառական պրակտիկայում, միայն այդ շրջանակներում կիրառվելու դեպքում, վեճի առարկա հոդվածի դրույթները կարող են սահմանադրական համարվել։ Եթե ոչ իրավաբանն այս տարբերությունը դժվարությամբ կարող է ընկալել, թերևս, մասնագետները, այդ թվում նաև իրավական թեմաներով գրող լրագրողները, պետք է իրավունքի լեզուն պատշաճ ընկալեն ու մեկնաբանեն։ 
Երկրորդ՝ ապատեղեկատվություն է այն թեզը, ըստ որի՝ այս որոշումը որևէ ազդեցություն չի ունենա դատարաններում արդեն իսկ քննվող գործերի վրա։ 
Սահմանադրական դատարանի որոշումն ուժի մեջ է մտել և գործում է 2011 թ.-ի նոյեմբերի 15-ից, և որևէ իրավակիրառող այդ իսկ օրվանից այն շրջանցել չի կարող։ Եթե օրենքի այդ դրույթը կիրառվի այլ մեկնաբանությամբ, քան սահմանադրական դատարանի կողմից ներկայացված դիրքորոշումներն են, ապա կստեղծվի հակասահմանադրական իրավիճակ, և, վերջին հաշվով, այդ դատական ակտը ենթակա կլինի վերանայման՝ «Սահմանադրական դատարանի մասին» ՀՀ օրենքում կատարված վերջին փոփոխությունների և նոյեմբերի 22-ից ուժի մեջ մտած իրավակարգավորման ուժով։ 
Ցանկալի է՝ կարծիք արտահայտելուց առաջ ծանոթանալ նաև օրենսդրական այս վերջին փոփոխություններին ու դրանց հիման վրա նոր հանգամանքներով դատական գործերի նորոգման ինստիտուտի էությանը։