«Ինձ նմանների շնորհիվ են Սերժ Սարգսյանն ու Ռոբերտ Քոչարյանը ՀՀ քաղաքացիություն ստացել, և այժմ նրանք ուզում են արտաքսել ինձ». Սարգիս Հացպանյան

«Հայացք» մամուլի ակումբում այսօր լրագրողների հետ հանդիպեց ֆրանսահայ ազատամարտիկ Սարգիս Հացպանյանը։ Հանդիպման առիթը նրան ՀՀ քաղաքացիություն չտրամադրելու՝ ՀՀ ոստիկանության որոշումն էր։

«Հայաստանում եմ դեռևս խորհրդային տարիներից, ՀՀ և ԼՂՀ քաղաքական ամբողջ վերնախավին ավելի լավ եմ ճանաչում, քան իրենց կանայք», - ասաց Հացպանյանը։

Արցախյան շարժման սկզբում Ֆրանսիայում բազմաթիվ բողոքի ակցիաների մասնակցած Հացպանյանն այնուհետև եկել է Հայաստան և հենց Արցախում շարունակել իր պայքարը՝ դառնալով «Ազատագրական բանակ»-ի հիմնադիրներից մեկը։

Սարգիս Հացպանյանը, ով այսօր ՀՀ-ում կեցության փաստաթուղթ ստանալու խնդիր ունի, պատերազմի ժամանակ Արցախի երկու անձնագիր է ունեցել, որոնցում, որպես նրա ծննդավայր, նշված են եղել Դրմբոնն ու Մոխրաթաղը, որպեսզի զոհվելու դեպքում չիմանային նրա՝ սփյուռքահայ լինելը։

«Ինձ նմանների շնորհիվ են Սերժ Սարգսյանն ու Ռոբերտ Քոչարյանը ՀՀ քաղաքացիություն ստացել, և այժմ այդ նույն մարդիկ ուզում են արտաքսել ինձ», - ասաց Հացպանյանը։

Նա պատմեց, որ 1996 թ.-ին ստացել է ՀՀ-ում տասը տարվա կեցության վկայական Լևոն Տեր-Պետրոսյանից, իսկ 2006-ին՝ Ռոբերտ Քոչարյանից։ Այդ փաստաթղթի վավերականության ժամկետը մինչև 2016 թ.-ն է, սակայն 2008 թ.-ի մարտին Ռոբերտ Քոչարյանը նրան Հայաստանից արտաքսելու որոշում է կայացրել։

«Մինչև 2008 թ.-ի փետրվարի տասնինը որևէ քաղաքական քարոզարշավի չեմ մասնակցել, բայց երբ նույն օրվա երեկոյան Ֆրանսիայի նախագահը շնորհավորեց Սերժ Սարգսյանին՝ նախագահ ընտրվելու կապակցությամբ, խիստ վրդովվեցի։ Զանգեցի Ֆրանսիայի դեսպանատուն և, որպես Ֆրանսիայի քաղաքացի, պահանջեցի բացատրել, թե ինչպե՞ս կարող է Սարկոզին շնորհավորական ուղերձ հղել, երբ Հայաստանում քվեատուփերն անգամ բացված չեն», - ասաց Հացպանյանը։

Նա ավելացրեց, որ միայն դրանից հետո է ինքը միացել Ազատության հրապարակի ցուցարարներին։

Մարտի մեկի դեպքերից հետո երեք տարի բանտում անցկացրած Հացպանյանին խոստացել են ազատվելուց հետո՝ երեք շաբաթվա ընթացքում, տրամադրել ՀՀ քաղաքացիություն, սակայն ժամկետը լրանալուց հետո պարզվել է, որ նրա դիմումը մերժվել է՝ ԱԱԾ կողմից ներկայացված առարկության պատճառաբանությամբ։

ՀՀ-ում Ֆրանսիայի դեսպանի խորհրդով՝ Հացպանյանը հայց է ներկայացրել դատարան՝ պահանջելով ներկայացնել իրեն մերժելու օրինական հիմքեր։

«Այդ ինչպե՞ս է, որ մինչև 2008 թ.-ն ես պետության համար որևէ վտանգ չէի ներկայացնում, իսկ դրանից հետո հանկարծ դարձա վտանգավոր, մանավանդ, որ մինչև վերջ կրել եմ այդ շինծու մեղադրանքներով՝ ինձ տրված պատժաչափը. միակ քաղբանտարկյալն եմ, ով համաներմամբ չի ազատվել», - տարակուսում է Հացպանյանը։

Ի դեպ, արտաքսման հրամանը կարող է չեղյալ հայտարարվել ՀՀ նախագահի կողմից, սակայն Սարգիս Հացպանյանը կտրականապես հրաժարվում է նման խնդրանքով դիմել Սերժ Սարգսյանին, քանի որ չի ճանաչում նրան՝ որպես ՀՀ լեգիտիմ նախագահ։

Երկուշաբթի նշանակված է Սարգիս Հացպանյանի ներկայացրած դատական հայցի առաջին նիստը։ Ազատամարտիկը վճռական է տրամադրված և ասում է, որ կդիմի մինչև Մարդու իրավունքների եվրոպական դատարան։ Նա ասում է, որ, 2008 թվականից սկսած, մարդու իրավունքների խախտման սահմանված տասնութ կետերից տասնեմկն իր հանդեպ կիրառվել են։

Իսկ մինչ հարցի վերջնական լուծումը՝ նա կարողանում է Հայաստանում մնալ՝ իր երկու անչափահաս երեխաների շնորհիվ։ «Տղաս չի ուզում մեծանալ, որ ինձ երկրից չվտարեն», - ամփոփեց ասուլիսը Հացպանյանը։