Ո՞վ է ստում` գյուղացիները, թե գյուղատնտեսության նախարարությունը

Օրերս Lurer.com-ն անդրադարձել էր ՀՀ գյուղական համայնքներում անասնակերի սակավության խնդրին:  Տեղեկությունը ճշտելու համար զանգահարել էինք անասնակերի ամենամեծ պակաս ունեցող Արագածոտնի մարզի Ռյա-Թազա, Ալագյազ, Բերքառատ, Ներքին Բազմաբերդ գյուղական համայնքների ղեկավարներին, զրուցել էինք նաև բնակիչների հետ: Վերջիններս հաստատել էին անասնակերի պակասի լուրը և հայտնել, որ ով հնարավորություն ունի  ուրիշ վայրից է բերում այն, շատ բարձր՝ 1 խուրձը 1,600-1,700 դրամ գնով, իսկ ով չունի՝ ստիպված մորթում է անասունների մի մասը՝ մնացածի համար կեր հայթայթելու համար: Իսկ այն հարցին, թե արդյոք կարողանում են առանց խոչընդոտների անտառի խոտը հավաքել, գյուղապետերից երեքը պատասխանել էին, որ իրենք  հեռու են անտառներից, իսկ Ռյա-Թազայի գյուղապետն ասել էր, որ դրա համար նրանցից գանձվում է 1 հա-ի հաշվով 8,000-12,000 դրամ՝ չնայած Գյուղատնտեսության նախարարությունը հանձնարարել էր անտառային տնտեսություններին  խոտը տրամադրել անվճար:

Երեկ՝ օգոստոսի 29-ին, Գյուղատնտեսության նախարարությունը հաղորդագրություն տարածեց` փորձելով հերքել փաստը: ՀՀ գյուղատնտեսության պաշտոնական լրահոսում ասվում է. «ՀՀ գյուղատնտեսության նախարարությունը հորդորում է գյուղացիական տնտեսություններին և ֆերմերներին՝ գյուղոլորտին առնչվող բոլոր հարցերի պատասխանները փնտրել գյուղատնտեսության նախարարության մասնագիտական վերլուծությունների, հրապարակումների և տեղեկատվությունների մեջ՝ զերծ մնալով կասկածելի, ապակողմնորոշող, երբեմն նույնիսկ, միտումնավոր հրապարակումներից»:

Զարմանալի է, թե ինչպես է Նախարարությունը «հանգիստ խղճով» հայտնում, որ ՀՀ-ում անասնակերի խնդիր չկա, երբ անձամբ գյուղացիներն են այդ մասին վկայում: 

Lurer.com-ը մեկ անգամ ևս կապ հաստատեց Ռյա-Թազայի գյուղապետ Ահմադ Բրոյանի հետ, ով հաստատեց, որ Գյուղնախարարությունը և Արագածոտնի մարզպետարանը քայլեր են ձեռնարկում՝ օգնելու գյուղացիներին: Նա մասնավորապես ասաց, որ իրենք ամբողջ գյուղով որոշել են  չմորթել անասունները, քանի որ խոստացել են խտացված կեր տրամադրել, նաև գյուղացուն 8-10%-ով վարկավորել՝ խոտ գնելու համար: Նա նշեց նաև, որ Ապարանի անտառից արդեն իսկ  թույլատրում են անվճար խոտ հնձել և տանել, թեև մոտ երկու շաբաթ առաջ նրանք ստիպված էին 1 հա-ի համար վճարել 8,000-12,000 դրամ:

Ալագյազի գյուղապետ Ազիզ Մհոյանը Lurer.com-ի հետ զրույցում  նշեց, որ չնայած խոտի մեկ խրձի գինը 1,700 դրամից նվազել է 200 դրամով, դա խնդրի լուծում չէ, քանի որ մեկ կովը ձմեռվա ընթացքում սպառում է 100 խուրձ խոտ, ինչը կազմում է 150,000 դրամ, այն դեպքում, երբ կովի կաթը վաճառվում է ընդամենը 90-100 դրամով:

Գյուղացին ինչպե՞ս իրեն հետաքրքրող հարցերի պատասխանները փնտրի Գյուղատնտեսության նախարարության հրապարակումների և վերլուծությունների մեջ, երբ ինքը կանգնած է անասնակերի պակասի  առջև ու  ստիպված  է մորթել անասունների մի մասը, իսկ Նախարարությունը  հանգիստ հայտնում է, որ նման խնդիր չկա Հայաստանում, «քանի որ շատ մարզերում խոտն առատ է»: Գյուղատնտեսության նախարարությունը չի՞ մտածում՝ գյուղացին ինչ միջոցներով է տեղ հասցնելու հարակից մարզերի «առատ խոտը»: Չէ՞ որ դա նույնպես կապված է ծախսերի հետ, որի հնարավորությունը գյուղացիները չունեն և ստիպված մորթում են անասունների մի մասը, որպեսզի կարողանան գումար հայթայթել «առատ խոտը»  տուն հասցնելու համար:

Եվ վերջում կարելի է նշել, որ  ՀՀ գրեթե բոլոր լրատվամիջոցներն անդրադարձել էին անասնակերի պակասի խնդրին, ուստի այն ապատեղեկատվություն և թեմայի չարաշահում չի կարող լինել, ինչպես նշվում է Գյուղնախարարության պաշտոնական լրահոսում:

Lurer.com-ը հետևողական է լինելու Նախարարության՝ անասնակերի խնդիր ունեցող գյուղական համայնքներին օգնություն տրամադրելու հարցում: Եթե գյուղացին չկարողանա կեր հայթայթել անասունների համար, ապա նա, ի վերջո, ստիպված կլինի վաճառել կամ մորթել իր կենդանիներին, ինչը 2013 թ.-ին կհանգեցնի տավարի մսի թանկացման նոր ալիքի: