Նոր քաղա՞ք Հայաստանում

Facebook սոցցանցի օգտատերերը բացել են «Լույսի քաղաք» խումբը, որտեղ պատրաստվում են քննարկել կրթագիտաարտադրական ուղղվածության նոր քաղաքի կառուցման առաջարկներ, տարբերակներ: Նախատեսվում է, որ քաղաքը կունենա 50000-70000 բնակչություն և կլինի «Դաուն Թաուն»-ի հայկական տարբերակը՝ առանց երկնաքերերի, արտադրական հատվածով, 1-2 հարկանի բնակելի առանձնատներով, ուսանողական կամպուսներով և սոցիալական բնակարաններով: Գաղափարի հեղինակները քաղաքի կառուցման մեջ դնում են հետևյալ նպատակները.

1. մարդկային հոգեւոր եւ նյութական ներդաշնակություն ապահովող նոր կենսաձեւի ձևավորում ՀՀ սահմանադրության եւ օրենքների շրջանակներում. «մարտահրավեր 21-րդ դարի մարտահրավերներին»,
2. Երեւանի բեռնաթափում եւ բնակչության ապակենտրոնացում էկոլոգիապես մաքուր տարածաշրջաններում և սեյսմակայուն բնակարաններում,
3. Գիտակրթական և բարձր տեխնոլոգիաների ոլորտների զարգացման խթանում,
4. Արտագաղթի նվազեցում և սփյուռքահայության հայրենադարձության խթանում,
5. Նոր տուրիստական կենտրոնի հիմնում:

 Քաղաքը ունենալու է նոր, 21-րդ դարին հարիր քաղաքային ուրույն մշակույթ՝ զերծ սպառողական եւ նյութապաշտական ծայրահեղություններից, կազինոներից, գիտելիքահեն հոգևոր, ոգեղեն արժեքների, բնապահպանության գերակայությամբ: Քաղաքում ի սկզբանե բացառվելու է կոռուպցիան: Քաղաքն ունենալու է իր հեռուստաընկերությունը, ուր քննարկումների միջոցով գեներացվելու են նոր մշակույթը և նոր կենսաձևի մղող գաղափարներ:

Քաղաք տեղափոխվող բնակիչները նախորոք պետք է պայմանավորվեն, որ որևէ պարագայում չեն զիջելու քաղաքի իշխանությունը որևէ օլիգարխի կամ որևէ գործող կուսակցության: Բնակիչները ուղիղ ընտրություներով ընտրելու են իրենց քաղաքապետին և ավագանուն' բարոյական բարձր հեղինակություն ունեցող մարդկանց և ոչ թե թաղային հեղինակությունների կամ փողատերերի:

Հայկական նոր ճարտարապետության և քաղաքաշինության արևմտյան նորագույն տեխնոլոգիաների զուգակցմամբ կառուցված այս քաղաք-այգին իր ճարտարապետական և քաղաքաշինական լուծումներով պատասխան է տալու այն մարտահրավերներին, որոնց առջեւ կանգնած է 21-րդ դարի մարդը:
Քաղաքը համապատասխանելու է էկոլոգիական ամենախիստ չափանիշներին: Շենք-շինություները կառուցված են լինելու 10 բալանոց սեյսմակայունության հաշվարկով, էներգախնայող և թեթև նորագույն շինանյութերի և կոնստրուկցիաների կիրառմամբ, հաշմանդամների ազատ տեղաշարժի համար անհրաժեշտ բոլոր հարմարություններով, հանրային տրանսպորտի բացառապես էլեկտրական տեսակների առկայությամբ, հեծանիվների համար նախատեսված հատուկ ճանապարհներով, մասնավոր էլեկտրամոբիլների անվճար լիցքակայաններով: Բենզինով աշխատող ավտոմեքենաների վրա դրվող բարձր էկոլոգիական քաղաքային հարկով խրախուսվելու են գազով աշխատող մեքենաները:
Բնակելի տների կառուցման համար ցանկացողներին անվճար կտրամադրվի մի քանի ստանդարտ պրոյեկտներ: Սակայն անկախ ամեն բանից դրանց չափերը չեն գերազանցի 2 հարկը  և 150 ք.մ.-ը, իսկ տնամերձ հողատարածքները' 500 ք.մ.-ը:

Դեպի քաղաք խրախուսվելու է սփյուռքահայության ներգաղթը, այդ թվում' հատկապես երիտասարդության, դասախոսական կազմի, գիտաշխատողների եւ թոշակառուների:

Ամենակոպիտ հաշվարկներով Քաղաքի շինարարությունը կարժենա 1,1-1,3 մլրդ դոլար, որից պետության ուսերին կընկնի ընդամենը 200-300 մլն դոլարը' որպես «չվերադարձվող» կապիտալ ներդրում, որը կուղղվի ենթակառույցների, ինչպես նաեւ դպրոցների, մանկապարտեզների, մարզահամալիրների, արվեստի օջախների շինարարության և կահավորման, սարքավորումներով հագեցման վրա:
Երեւանից տեղափոխվող բուհերի և ԳՀ ինստիտուտների շինարարության գումարը կփոխհատուցվի դրանց երևանյան մասնաշենքերի վաճառքի հաշվին: Մասնավոր բնակելի տները' լինելով ավելի էժան, կգնվեն, կվարձակալվեն կամ  կկառուցվեն երևանյան իրենց տները,բնակարանները վաճառած կամ վարձակալությամբ հանձնած նորաբնակների կողմից: Այլ բիզնես-ենթակառույցները կկառուցվեն բիզնես-ներդրումների հաշվին: Այդ նպատակով անհրաժեշտ է Քաղաքը հայտարարել Ազատ տնտեսական գոտի և առնվազն 10 տարով ազատել մի շարք հարկերից, այդ թվում' գույքահարկից, հողի հարկից և շահութահարկից: Հարկային, վարկային, ներդրումային մեխանիզմները ևս պետք է քննարկվեն և կարոտ են նոր ստեղծագործ մոտեցման և նոր առաջարկների:
Քաղաքը բաց է լինելու բոլոր այն այլազգիների համար, ովքեր պատրաստ կլինեն որոշակի գումարից (դիցուք' 300.000 եվրոից) ավելի ներդրումներ իրականացնել նրանում' քաղաքային իշխանություների կողմից հաստատվող նախագծերի վրա: Ավելին, քաղաքային իշխանությունների հիմնական գործառույթներից մեկն էլ լինելու է արտասահմանից և Հայաստանի այլ վայրերից ներդրումների ներգրավումը և խրախուսումը:

«Լույսի քաղաք» Ֆեյսբուքյան խմբում կարող եք մասնակցել քաղաքի շուրջ քննարկումներին, հանդես գալ ձեր առաջարկություններով և դիտողություններով: