Պետական աշխատողները չեն կարող թիկնապահ վարձել պետության հաշվին

Այսօր ԱԺ ՀՀԿ խմբակցության պատգամավոր Հովհաննես Սահակյանը լրագրողների հանդիպմանը խոսեց «Մասնավոր պահնորդական ծառայության մասին» օրենքի առավելություններից և թերություններից։ Անդրադառնալով օրենքի բացերին՝ պատգամավորը նշեց, որ ցանկացած նախագծի, ցանկացած օրենքի թերություններն ավելի ակնառու են դառնում, թեև դրանցից մի քանիսը օրենքի ընթերցման ընթացքում ի հայտ եկել են։ «Մեր հարց ու պատասխանների ժամանակ երևացին մի շարք բացեր՝ ձևակերպումների մեջ, խմբագրական, հատկապես այն դրույթը, որով սահմանվում է, որ պետական աշխատողները, պետական իշխանության ներկայացուցիչները չեն կարող ունենալ թիկնապահներ։ Այդ դրույթի մեջ մենք ի նկատի ենք ունեցել, որ նրանք պետբյուջեի հաշվին չեն կարող ունենալ թիկնապահներ»,– բացատրեց նա։

Ուղեկցող մեքենաների և թիկնապահների թիվն օրենքը հստակ սահմանում է։ Մեքենաների թիվը պետք է լինի մեկը, և այդ մեքենայի համարանիշը պետք է գրանցված լինի ոստիկանությունում։ Պատգամավորը նշեց, որ եթե այս կանոնները չեն պահպանվում, կան պատժիչ մեխանիզմներ, որոնք անմիջապես կանցնեն գործի՝ ընդհուպ մինչև լիցենզիայից զրկում, «Վարչական իրավախախտումների մասին» օրենսգրքով որոշակի տուգանքների սահմանում։ Տուգանքի նախնական չափը սահմանվել է նվազագույն աշխատավարձի երկուհարյուրապատիկը։

«Բավականին լուրջ նորմեր ենք մենք հատկացրել, սկսած նրանից, որ երբ թիկնապահը կամ պահնորդը զենքը կիրառում է, նա պետք է այդ մասին հայտնի ոչ միայն այն կազմակերպությանը, որտեղ ինքն աշխատում է, այլ անձամբ հայտնի ոստիկանությանը, որ գործածել է զենք։ Սկսած դրանից, մինչև այն, երբ թիկնապահն ականատես է լինում հանցագործության», – նշեց ՀՀԿ պատգամավորը։ Ըստ պատգամավորի՝ դա արվում է, որպեսզի այս օղակը չդառնա հանցագործություններ կամ վատ արարքներ թաքցնող օղակ։

Ինչ վերաբերում է այն հարցին, որ նախկին հանցագործները ևս կարող են դառնալ թիկնապահ, Հ. Սահակյանը պատասխանեց, որ դա արվել է, որպեսզի օրինական եղանակով իր պատիժը մարած մարդը չառանձնացվի հասարակությունից։ Ըստ նրա՝ այս հարցում արգելքը հավանաբար կտարածվի միայն խիստ ծանր հանցագործություններ կատարածների վրա։