Պարո՛ն վարչապետ, հարուցված քրեական գործերով քաղաքական ընդդիմախոսներին ձերբակալելն անընդունելի է. Արտակ Թովմասյան

Առաջնային ցանկանում եմ դիմել հայ ժողովրդին, ՀՀ յուրաքանչյուր քաղաքացու, Արցախի եւ Սփյուռքի իմ հայրենակիցներին։

Դժվարագույն ժամանակներ ենք ապրում. բոլորիս ցավն ու կսկիծը նույնն է։ Այսօր ավելի քան երբեւէ պետք է լինենք համախմբված եւ գործենք միասնական՝ հանուն մեր զինվորների, երկրի պատմության, պետականության, տարածքային ամբողջականության, սուվերենության պահպանման։

Իշխանության կամահայտնությամբ հարուցված քրեական գործերով ընդդիմախոսներին ձերբակալելն անընդունելի է եւ անհիմն, քանի որ երկրի կարեւորագույն խնդիրները դրանով չեն լուծվում: Հասարակությանն այդ մեխանիզմներով լռեցնել ու մոլորեցնել հնարավոր չէ, ընդհակառակը, դրանից բռնկվում է թեժ քաղաքական պայքար, անարդարության ծանր զգացում եւ անվստահություն իշխանության նկատմամբ՝ այն իշխանության, որն ինքը հրահրեց պատերազմ ՝ դիվանագիտական բանակցությունները տեղափոխելով ռազմի դաշտ։

Պարո՜ն վարչապետ, այս ձերբակալություններով, հարցաքննություններով, խուզարկություններով և խաբեությամբ Ձեզ ցանկալի արդյունքին՝ իշխանությունն ու հասարակությունը Ձեր շուրջ կենտրոնացնելուն, հասնել չեք կարող, եւ եթե անգամ հասնեք, դա լինելու է խիստ ժամանակավոր: Ձեր անձնական նկրտումներից ելնելով՝ մեր ձայնը մի՜ ծառայեցրեք ձեր ապօրինի գործերին։

Օրհասական այս պահին Ձեր գործողությունների գնահատականը կարող է տալ միայն ժողովուրդը՝ արտահերթ ընտրությունների ընթացքում՝ իր ձայնի միջոցով։

Խոսքս ուղղում եմ իրավապահ մարմինների ներկայացուցիչներին՝ հավատարիմ մնացեք ձեր երդմանը, այն է ՝ պահպանել ՀՀ սահմանադրական կարգը, անվերապահորեն ղեկավարվել օրենքով, պաշտպանել հայրենիքը։ Դեմ դուրս մի՛ եկեք այն ժողովրդին, որի մասնիկն եք, այլ ոչ իշխանության կամակատարը։ Դուք պատասխանատու եք հայրենիքի, զինվորների, ձեր իսկ ծնողների ու զավակների առաջ։ Ես վստահում եմ ձեր դատողությանը. չէ՞ որ Արցախյան ծանր պատերազմում ինքներդ էլ եք կորցրել հարազատներ, ընկերներ, գործընկերներ, հրամանատարներ և պետք է քաջ գիտակցեք այս կապիտուլյացիայի ողջ բեռն ու ցավը, որ զգում է յուրաքանչյուր հայ։

Հիշե՛նք՝ անթույլատրելի է ժամավաճառությամբ զբաղվելը. ամեն պահը կարող է անդառնալի հետեւանքներ ունենալ հայկական զույգ պետությունների ու ողջ հայ ժողովրդի համար: Մեզնից յուրաքանչյուրի կայացրած որոշում կարող է ունենալ առանցքային նշանակություն` այս ծանր դրության վերջնական լուծման համատեքստում:

Մեր եւ մեր երկրի բոլոր խնդիրները պետք է լուծել ՄԻԱՍՆԱԲԱՐ։

ՄԻԱՍԻՆ ՄԵՆՔ ԿԱՐՈՂ ԵՆՔ»: