Քննարկել, թե ումն է առաջինը եղել Արցախը՝ անարդյունավետ էր․ Անուշ Բեղլոյանը՝ իր հակահայկական ելույթի մասին (տեսանյութ)

«Իմ քայլը» խմբակցության պատգամավոր, ԱԺ Արտաքին հարաբերությունների մշտական հանձնաժողովի անդամ Անուշ Բեղլոյանը  հունվարի 29-ին մասնակցեց  Եգոր Կուրոպտեւի «Սահմանային ԶՈՆԱ» նախագծի կողմից կազմակերպված «Հարավային Կովկաս. Նոր սպառնալիքներ և նոր հնարավորություններ» առցանց համաժողովին։

Քննարկմանը մասնակցում էին նաև Հարավային Կովկասում ԵՄ հատուկ ներկայացուցիչ Թոյվո Կլաարը, Միջազգային հարաբերությունների վերլուծության կենտրոնի նախագահ դեսպան Ֆարիդ Շաֆիևը (Ադրբեջան) և EPRC փորձագետը, Բալթյան պաշտպանության քոլեջի դասախոս Դեսպան Շոթա Գյուներիաը (Վրաստան):

Առցանց կոնֆերանսից հետո քննարկման մեծ ալիք բարձրացրեց Անուշ Բեղլոյանի ելույթը, որը շատերը համարեցին հակահայկական: Մի շարք կայքեր սկսեցին նյութեր հրապարակել «Կարևոր չէ՝ ով է սկսել պատերազմը, ում պատմական հողն է Արցախը. պետք է առաջ նայենք» վերնագրերով: ԼՈՒՐԵՐ.com-ը այդ արտահայտության վերաբերյալ մեկնաբանություն ստանալու նպատակով կապ հաստատեց Անուշ Բեղլոյանի հետ, որը ներկայացրեց իրավիճակը իր տեսանկյունից.  «Եթե նայեք կոնֆերանսի թարգմանությունը կամ լսեք բուն ձայնագրությունը, կտեսնեք, որ ես ընդամենը ասել եմ, որ եթե մենք խոսում ենք պատմական ասպեկտի մասին, մեր հայերից ավելի լավ որևէ մեկը պատմական մեջբերումներ և անտիկ գրողներին ցիտել չի կարող: Այսինքն այսքանով ես ասել եմ, որ եթե մենք մտնենք այս խոսակցության մեջ, թե առաջինը ումն է եղել այդ պատմական հողը, ապա, ակնհայտ է, որ հայերից լավ որևէ մեկը դա ապացուցել չի կարող»,- պարզաբանեց պատգամավորը:

Նա նաև անհասկանալի համարեց իր այդ արտահայտությունը մանիպուլացնելու իմաստը. «Ես լրիվ հակառակ բան եմ ասել, և այն, ինչ ներկայացվել է կայքերում, հակասում է իմ ասածին»,- ընդգծեց Բեղլոյանը:

Կոնֆերանսը, քանի որ վերաբերում էր տարածաշրջանային անվտանգության թեմային, մեր զրուցակիցը հաստատեց, որ չի մանրամասնել, թե Արցախն իրականում ումն է եղել. «Քանի որ քննարկման թեման պետք է լիներ տարածաշրջանային անվտանգության մասին, ապա այդ համատեքստում, թե ումն է առաջինը եղել Արցախը՝ անարդյունավետ էր, քանի որ պարզ էր դրա արդյունքը. ես չեմ շարունակել այդ թեման սադրանքներից խուսափելու համար»,- նշեց Անուշ Բեղլոյանը:

Պատգամավորը նշեց, որ Թուրքիայի ներկայացուցիչը իրեն թույլ էր տվել շատ վատ արտահայտություններ, որին էլ, ի պատասխան, նա ասել է, այն խոսքը, որը, ըստ իրեն, խեղաթյուրվել է. « Թուրքիայի ներկայացուցիչն ասաց, որ պատերազմի արդյունքում վերականգնվել է պատմական արդարությունը, և ես չեմ հասկանում, թե ինչու է իմ մեջբերված խոսքը դարձել շահարկումների առարկա»,- ասաց մեր զրուցակիցը:

Նա նաև բացառեց, որ ասել է, թե կարևոր չէ՝ ով է սկսել պատերազմը:

Մանրամասները՝ տեսանյութում

Զվարթ Պետրոսյան