Կանայք՝ թրաֆիքինգի զոհ

Մարդկանց թրաֆիքինգի շահագործման հատկանիշներով՝ 2011 թ.-ի առաջին կիսամյակում վարույթ է իրականացվել քրեական տասը գործերով:

Ինչպես տեղեկացնում են Հայաստանի Հանրապետության ոստիկանության լրատվության և հասարակայնության հետ կապերի վարչությունից՝ տասը գործերից հինգը նախկինում հարուցված և 2011 թ.-ի փոխանցված գործերն են, երկուսը՝ վերսկսվել են հետախուզվողների հայտնաբերման կապակցությամբ: Այդ գործերից ութը վերաբերել են կանանց պոռնկության շահագործմանը, մեկը՝  ՀՀ-ում անչափահասի շահագործմանը՝  մուրացկանության մեջ ներգրավելու միջոցով: Պոռնկության շահագործման 8 գործերից հինգը ներքին թրաֆինքինգի կամ շահագործման դեպքերն են. երեքի շահագործումը իրականացվել է Արաբական Միացյալ Էմիրություններում: Նշված գործերով հայտնաբերվել և տուժող են ճանաչվել նոր՝ 8 զոհեր, որոնցից 7-ը՝ կանայք: Ութ զոհերից երկուսը հանցագործության կատարման ընթացքում եղել են անչափահասներ:

Հետագա աջակցության նպատակով՝ հասարակական կազմակերպություններ են ուղղորդվել վերոգրյալ տուժողներից՝ իրենց համաձայնությունը տված երկու զոհեր: Մյուս հինգ զոհերը չեն համաձայնել ուղղորդվել ՀԿ-ներ՝ պատճառաբանելով, որ նպատակահարմար են համարում ռեաբիլիտացվել իրենց ընտանիքներում, սակայն շարունակում են այդ ուղղությամբ նրանց հետ աշխատանքները:

Առաջին կիսամյակի նոր մեղադրյալները տասն են, որոնցից երեքը գտնվում են կալանքի տակ, երեքի նկատմամբ խափանման միջոց է ընտրվել չհեռանալու մասին ստորագրությունը, չորսի նկատմամբ հայտարարվել է հետախուզում:

ՀՀ ոստիկանության կողմից իրականացվել են թրաֆիքինգի դեմ պայքարի ոլորտի բարելավմանն ուղղված միջոցառումներ: Հասարակական և միջազգային կազմակերպությունների հետ համատեղ՝ ոստիկանության համակարգման և անմիջական մասնակցությամբ, ոստիկանության թվով 55 աշխատակիցների համար կազմակերպվել են թրաֆիքինգի խնդիրներին վերաբերվող դասընթացներ՝ Ուկրաինայում և Բելառուսի Հանրապետությունում՝ այլ պետությունների ներկայացուցիչների հետ համատեղ:

Հասարակության իրազեկումը բարձրացնելու նպատակով՝ նյութեր են տրամադրվել զանգվածային լրատվական միջոցներին, հարցազրույցներ տրվել մի շարք լրագրողների: