«Ուզում եմ սիրահարվեք մարդու իրավունքների փիլիսոփայությանը». Լարիսա Ալավերդյան

«Ես ուզում եմ շնորհավորել ԼՂՀ–ի կողմից սահմանադրության ընդունման 5-ամյակը», – այսօր Մարդու իրավունքների միջազգային օրվա կապակցությամբ կազմակերպված ասուլիսին այս շնորհավորական ուղերձով հանդես եկավ ԱԺ խմբակցության պատգամավոր, ՀՀ մարդու իրավունքների նախկին պաշտպան Լարիսա Ալավերդյանը։

«Բոլորիս շնորհավորում եմ այս օրվա կապակցությամբ և ուզում եմ, որպեսզի դուք սիրահարվեք մարդու իրավունքների փիլիսոփայությանը», – ասաց պատգամավորը։

Լարիսա Ալավերդյանի խոսքերով՝ մարդուն չպետք է զրկել իր ընտրած ապրելակերպից։

«Այսօր մենք պետք է ամփոփենք, թե ի՞նչ է արվել, ի՞նչ ունենք անելու՝ ակնկալելով պետական մարմինների աջակցությունը։ Սակայն այստեղ հասարակությունն էլ պետք է ակտիվություն ցուցաբերի, հակառակ դեպքում՝ չի կայանա մարդու իրավունքների պաշտպանությունը», – նկատեց ԱԺ խմբակցության պատգամավորը։

Նա տեղեկացրեց, որ դատաիրավական համակարգի վերաբերյալ բողոքներն այսօր շատանում են, ինչը նշանակում է, որ մարդիկ առավել տեղեկացված են, սակայն պետությունը դժվար է հրաժարվում իր կարծրատիպերից։ «Չի կարող լինել ազատ երկիր, ազատ պետություն, եթե այդ երկրում քաղաքացին ազատ չէ», – նշեց նա։

ԱԺ խմբակցության պատգամավորի համոզմամբ՝ այս օրը մտորելու օր է, քանզի մարդու իրավունքները վտանգված են։ «Պետք է պայքարես և ստանաս արդյունք. սա է մարդու իրավունքների օրվա կարգախոսը», – եզրափակեց Լարիսա Ալավերդյանը։