«Նարեկացի» արվեստի միության նախագահ Նարեկ Հարությունյանին կալանավորել են երկու ամսով

«Նարեկացի» արվեստի միության նախագահ Նարեկ Հարությունյանը կկալանավորվի երկու ամսով։ Այս որոշումն է կայացրել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը։

Նարեկ Հարությունյանը Պետեկամուտների կոմիտեի կողմից բերման էր ենթարկվել երեկ՝ առանձնապես խոշոր չափերի հարկերի մուծումից խուսափելու մեղադրանքով։

2011 թ.-ի դեկտեմբերի 9-ին Նարեկ Կարապետի Հարթունյանին մեղադրանք է առաջադրվել՝ ՀՀ քրեական օրենսգրքի 38-205 հոդվածի 2-րդ մասով, 205-րդ հոդվածի 2-րդ մասով (առանձնապես խոշոր չափերի հարկերը վճարելուց չարամտորեն խուսափելը) և 190-րդ հոդվածի 2-րդ մասի 1-ին կետով (հանցավոր ճանապարհով ստացված եկամուտները խոշոր չափերով օրինականացնելը, փողերի լվացումը), ընկերության փոխտնօրեն Անի Սերժիկի Մնացականյանին՝ ՀՀ քրեական օրենսգրքի 38-205 հոդվածի 2-րդ մասով, իսկ հաշվապահ Արթուր Արամի Գալստյանին՝ ՀՀ քրեական օրենսգրքի 205-րդ հոդվածի 2-րդ մասով, 38-205 հոդվածի 2-րդ մասով և 38-190-րդ հոդվածի 2-րդ մասի 1-ին կետով:

Վերոհիշյալ անձանց հանցավոր գործողություններով՝ պետությանը պատճառվել է շուրջ 109 միլիոն ՀՀ դրամի վնաս:

Նարեկ Հարությունյանի կալանավորման հետ կապված հաղորդագրությունը տարածել է նրա եղբայրը՝ Սարո Հարությունյանը։ Նա պնդում է, որ իր եղբորը ձերբակալել են սուտ և անհիմն մեղադրաքներով։ «Ոչ ոք մեղադրանք չի ներկայացրել եղբորս դեմ, ոչ էլ գրավի դիմաց ազատում են թույլ տալիս: Սա պարզապես հոգեբանական տեռոր է, որ իր արժանի գնահատականը պետք է ստանա. սա ամոթալի քայլ է, որ արվում է Նարեկ Հարությունյանից և նրա ընտանիքից մեծ գումարներ շորթելու նպատակով: Առանց այս դեպքի էլ՝ հայտնի է, որ Հայաստանում պետական ապարատն ու իրավական համակարգը ողողված են կոռուպցիայով, և սա վտանգում է Հայաստանի և Սփյուռքի ապագան: Եթե սփյուռքահայի հանդեպ այս պաշտոնի չարաշահումն անպատիժ մնա, ապա բոլոր սփյուռքահայերը, ովքեր ցանկանում են օգնել իրենց հայրենիքին, կասկածների մեջ կընկնեն», - գրել է Սարո Հարությունյանը:

Ի պաշտպանություն Նարեկ Հարությունյանի՝ "Facebook" սոցիալական ցանցում ստեղծվել է "Free Nareg" խումբը, որի անդամները կոչ են անում ազատ արձակել նրան։ «Ովքեր ճանաչում են Նարեկին կամ նրա անձնուրաց և կարևոր գործը, որը խրախուսում է արվեստը, ինչպես նաև աջակցում է երեխաներին և հաշմանդամներին Հայաստանում և Արցախում, բոլոր նրանց համար հեշտ է հասկանալ, թե ինչու է Հայաստանի իշխանությունների այս քայլը խայտառակություն», - գրված է ֆեյսբուքյան խմբի էջում տեղադրված հայտարարության մեջ: