Ալիևը հայտնել է արցախյան երկրորդ պատերազմն սկսելու պատճառների մասին
ԱդրբեջանԱդրբեջանի նախագահ Իլհամ Ալիեւը հայտարարել է, թե արցախյան երկրորդ պատերազմն անխուսափելի էր «Հայաստանի ղեկավարության սադրիչ հայտարարություններից և գործողություններից հետո»: Նրա խոսքերը մեջբերում է «Ինտերֆաքս» -ը:
«Վերջերս տեղի ունեցած ամեն ինչի համար պատասխանատու է Հայաստանի կառավարությունը, որը ձեռնարկել է բազմաթիվ սադրիչ քայլեր, գործողություններ և հրահրել պատերազմը», - ասել է Ալիևը՝ Բաքվում Ռումինիայի, Ավստրիայի և Լիտվայի արտգործնախարարների հետ հանդիպման ժամանակ:
Նա նենգափոխել է ՀՀ պաշտպանության նախարար Դավիթ Տոնոյանի հայտարարությունը («Նոր պատերազմ, նոր տարածքներ» - խմբ.), և պնդել, թե Տոնոյանը հայտարարել է` «Հայաստանը պատրաստվում է նոր պատերազմի` նոր տարածքների համար»:
«Սա բացահայտ սպառնալիք էր Ադրբեջանի համար»,- նշել է Ալիևը
Նա նաև հիշեցրել է Հայաստանի վարչապետ Նիկոլ Փաշինյանի հայտարարությունը, որ բանակցություններին պետք է մասնակցի նաև ԼՂ ղեկավարությունը:
«Իրականում դա ոչ միայն դեմ էր մեր շահերին, այլ նաև դեմ էր ԵԱՀԿ Մինսկի խմբի և նրա համանախագահների կողմից մշակված ձևաչափին: Հայաստանի ղեկավարության մեկ այլ սադրիչ հայտարարություն այն էր, որ «Ղարաբաղը Հայաստան է և վերջ»: Սա վերջ տվեց գործնականում բոլոր բանակցություններին», - ասել է Ադրբեջանի նախագահը:
«Այսպիսով, Ղարաբաղյան երկրորդ պատերազմն անխուսափելի էր, և դա բոլորի համար պարզ էր», - հավելել է Ալիևը: