Արցախի ապագայի վերաբերյալ փաստաթուղթն ընդունելու համար «Իմ քայլը» խմբակցությունը այդպես էլ ժամանակ չգտավ. Թագուհի Թովմասյան

ՀՀ ԱԺ անկախ պատգամավորներ Թագուհի Թովմասյանը, Աննա Գրիգորյանն ու Սոֆյա Հովսեփյանը նախաձեռնել են ԱԺ հայտարարության նախագիծ՝ «Ադրբեջանի Հանրապետության կողմից Արցախի Հանրապետության դեմ ուժի կիրառման եւ ղարաբաղյան հակամարտության ներկա փուլի մասին»: 

ԱԺ «Իմ քայլը» խմբակցությունը նախաձեռնել էր արտահերթ նստաշրջան, որն ավարտվեց այսօր, սակայն անկախ պատգամավորների նախաձեռնությունն այդպես էլ չի ներառվել ԱԺ-ի կողմից քննարկվող հարցերի շարքում:

Պատգամավորների բոլոր փորձերը՝ այս օրերին կազմակերպելու Արցախի ապագային առնչվող կարեւորագույն փաստաթղթի քննարկումը, ապարդյուն են անցել:

Լրագրողների հետ զրույցում Թագուհի Թովմասյանը նշեց, որ ուրվագծել էին որոշակի թեզեր, մտքեր և ճակատարգրական ձևակերպումներ, որոնք պետք է տեղ գտնեն ՀՀ Արտաքին քաղաքական օրակարգում։

Պատգամավորը նշեց, որ հայտարարության նախագիծը ներառված էր հունիսի 15 քառօրյա նիստի օրակարգում, որի ժամանակ քվորում չապահովվեց, ապա նոր արտահերթ նստաշրջանում են փորձել հարցը ներառել ու մերժում ստացել:

Թովմասյանը նաև նշեց, որ փաստաթուղթը ընդունելու համար իշխանական «Իմ քայլը» խմբակցությունը այդպես էլ ժամանակ չգտավ, մինչդեռ մեկ ամսից ավելի գոյություն չունեցող Արտաքին գործերի նախարարությունը եւ կառավարության մյուս ոլորտային գերատեսչությունները դրական գնահատական են տվել անկախ պատգամավորների նախաձեռնությանը: