Մանրամասներ՝ «Հաղթանակի Զբոսայգու» ատրակցիոնից վայր ընկած դեռահասի վիճակից. ArmDaily.am

ArmDaily.am-ի տեղեկություններով՝ երեկ ժամը 16-ի սահմաններում «Հաղթանակի Զբոսայգու» «Մրրիկ» ատրակցիոնից 16-17 տարեկան տղա է վայր ընկել։

«Ուրախ Ժամանց» ընկերության տնօրեն Վահրամ Ներսիսյանն ArmDaily.am-ի հետ զրույցում ասաց, որ ատրակցիոնի վրա քույր և եղբայր են եղել՝ 16-18 տարեկան։

«Ըստ մեր նախնական եզրակացության՝ հնարավոր է, որ երեխաները բացել են ամրագոտիները, արդյունքում, ընթացքի ժամանակ եղբայրը վայր է ընկել հարթակի վրա՝ 30-40 սանտիմետր բարձրությունից։ Քույրը մնացել է ատրակցիոնի վրա։ Մեր աշխատակիցը նկատել է, որ տղան վայր է ընկել ու անմիջապես կանգնեցրել է ատրակցիոնը։ Երեխայի վրա քերծվածքներ են եղել։ Մերոնք անմիջապես առաջին բուժօգնությունն են տրամադրել և շտապ օգնություն են կանչել, նրան տեղափոխել են հիվանդանոց։

Մեր աշխատակիցները երեխայի հետ գնացել են հիվանդանոց, որտեղ երեխային բուժզննում են կատարել։ Առավոտյան ինքս եմ այցելել հիվանդանոց, զրուցել եմ ծնողների և բուժող բժշկի հետ, վիճակը լավ է, այս պահին նրան վերակենդանացման բաժանմունքից տեղափոխել են պալատ։ Նա քերծվածքներ ունի ոտքին և գլխի շրջանում, իմ տեղեկություններով՝ վիճակը նորմալ է»։

Նա նշեց, որ ամրագոտիները շարժական են, այդ ատրակցիոնի գոտին ամրացնում են ու ձեռքերով բռնում են։ «Ըստ երևույթին՝ նա բարձրացրել է ամրագոտին, մենք զննել ենք ատրակցիոնը, սակայն անսարքություն չենք նկատել։ Կարուսելն այս պահին պլոմբած է, ոստիկաններն են պլոմբել, ովքեր դեպքից անմիջապես 3 րոպե անց արդեն տեղում են եղել»։ Նա նաև տեղեկացրեց, որ վայր ընկած տղան ամերիկահայ է եղել։