Սաուդյան Արաբիայի արքայազնը թույլատրել է երեխաներին թքել ծառաների երեսին

Սաուդյան Արաբիայի արքայազն Ֆեյսալ իբն Թուրքի իբն Աբդալլահ Ալ Սաուդին մեղադրել են ծառաների նկատմամբ վատ վերաբերմունքի մեջ, նա ընտանիքի անդամներին թույլ է տվել նվաստացնել ծառաներին, հայտնում է The Times-ը:

Ֆիլիպինցի յոթ դայակներ և հավաքարարներ, ովքեր աշխատում էին արքայազնի` Փարիզի առանձնատանը, կապ են հաստատել ֆրանսիական ոստիկանության հետ: Նրանք պատմել են, որ արքայազնի կինն ու երեխաները ստորացնում էին ծառաներին, սովահար անում նրանց ու թույլ չէին տալիս քնել: Արքայազնի ընտանիքը աշխատավարձերի հարցում նույնպես առատաձեռն չէր, նրանք ամսական վճարում էին ընդամենը 300 եվրո, այնինչ, պայմանագրում նշված էին ավելի բարձր գումարներ:

Դայակներից մեկը պատմել է, որ արքայազնի երեխաներին թույլ են տվել թքել իր դեմքին: Մեկն էլ բողոքել է, որ հարվածում էին իր դեմքին, եթե երեխաներից մեկը լաց էր լինում: Դայակները ստիպված էին կատարել երեխաների բոլոր քմահաճույքները և պատասխանատվություն կրել դրանց համար: Ծառաները պատժվում էին, եթե երեխան, օրինակ, իր կամքով ուտում էր պաղպաղակ. նրան արգելել անհնար էր, իսկ հետո նա ստամոքսի ցավ էր ունենում:

Կանայք չէին կարող ավարտել իրենց աշխատանքային օրը, քանի դեռ արքայազնը և նրա կինը չէին քնել, և ստիպված էին նորից աշխատանքի գնալ առավոտյան 7-ին: Նրանք սնվում էին սեղանի վրայի թերմացքներով և հաճախ ընդհանրապես մնում էին առանց ընթրիքի:

Դայակները և մաքրուհիները հիմնականում նկարագրել են 2013-2015 թվականների իրադարձությունները: Այժմ Ալ Սաուդը հեռացել է Ֆրանսիայից և վայելում է դիվանագիտական ​​անձեռնմխելիությունը: Եթե ​​չլինեին այս գործոնները, նրան կարող էր սպառնալ 10 տարվա ազատազրկում: