«Հայոց Հայրենիք»-ը օրենքի խախտում է համարում քվեաթերթիկի վրա ծանուցման բացակայությունը

«Հայոց Հայրենիք» կուսակցության ներկայացուցիչ Արտակ Գալստյանը պնդում է, որ արտահերթ խորհրդարանական ընտրություններին օրը ընտրողը ընտրատեղամաս մտնելուց պետք է հստակ պատկերացում ունենար, թե ինչ ընտրակարգով պետք է քվեարկի, սակայն քվեաթերթիկներում չկար ընտրակարգի վերաբերյալ ծանուցում։ Գալստյանը Սահմանադրական դատարանում արտահերթ խորհրդարանական ընտրությունների արդյունքները վիճարկող դիմումների քննության ժամանակ նշեց, որ Կենտրոնական ընտրական հանձնաժողովը ունի իր հայեցողական լիազորությունները օրենքով սահմանված կարգով դրույթը հաստատելու և քվեաթերթիկում ներկայացնելու։

«Կարծում եմ, որ պետք չէր ամբողջ ընտրական օրենսգրքից բոլոր դրույթները ուղղակի արտատպել քվեաթերթիկի վրա։ Բավական կլիներ, որպեսզի ընտրողը ընտրատեղամաս մտնելուց հստակ պատկերացում ունենար, թե ինչ կարգով պետք է քվեարկի՝ դա 4-5 տող է։ Կարելի է այդ ամենը հակիրճ  ներկայացնել (Կենտրոնական ընտրական հանձնաժողովը նման լիազորություն ունի)»,- ասաց Գալստյանը։

«Հայոց Հայրենիք» կուսակցության ներկայացուցչի կարծիքով՝ եթե կա օրենսդրական պահանջ, որ քվեաթերթիկը պետք է պարունակի ծանուցում ընտրակարգի մասին, անկախ նրանից, թե այն ինչ ծավալ ունի, չի կարող պատճառ լինել, որպեսզի հանրային իշխանությունը իր պոզիտիվ պարտականությունը չկատարի հենց այդ պատճառաբանությամբ։ 

«Այն պահին, երբ ընտրողը գտնվում է քվեախցիկում և, ըստ օրենքի, այնտեղ պետք է լինի միայնակ, քվեաթերթիկը վերցնելուց գոնե պետք է պատկերացում ունենա, թե ինչպես է վերջնականապես ընտրում։ Չեմ կարծում, որ այստեղ օրենսդրական բաց կա, ավելի շուտ սա Կենտրոնական ընտրական հանձնաժողովի կողմից անփութության խնդիր է»,- եզրափակեց Գալստյանը։