Շուշիի շրջանի Եղցահող գյուղի սահմաններից ՊԲ զինծառայողներին հեռացրել են․ գյուղն անպաշտպան է

Շուշիի շրջանի Եղցահող գյուղի սահմաններից օրերս Պաշտպանության բանակի զինծառայողներին հեռացրել են։ Այս մասին ԼՈՒՐԵՐ․com-ի հետ զրույցում ասաց  Եղցահողի գյուղապետ Արտակ Հակոբյանը։

Վերջինս անհանգստացած է, քանի որ գյուղի սահմանները ներկայիս դրությամբ անպաշտպան են․ «Եղցահողի բնակելի տները շփման գծից հեռու են ընդամենը 1,5 կմ, ինչպե՞ս չանհանգստանանք»,- ասաց Արտակ Հակոբյանը։

Հայկական վերահսկողության տակ գտնվող Հին Շեն և Մեծ Շեն գյուղերի սահմաններից էին հանվել հայկական զինծառայողները, համայնքապետը համոզված է՝ ներքին պայմանավորվածություն կա՝ զորքերը ետ քաշելու․ «Ինչ-որ պայմանավորվածություն կա՝ զորքերը հետ քաշելու։ Սկզբում մեր տղաներին մեր դիրքերից հանեցին այն պայմանով, որ մինչև վաղը  ադրբեջանցիներն էլ իրենց մասով 3 կիլոմետր ետ քաշվեն, դեռևս սպասում ենք։ Այսինքն՝ առաջինը զորքերը մենք քաշեցինք, իրենք այս պահի դրությամբ դեռ իրենց տեղում են»,- ասաց Եղցահողի համայնքապետը։

Ըստ նրա խոսքերի՝ գյուղում գիշերային հերթապահություն չկա, միայն ցերեկն են հսկում այն, ինչն էլ բարկացնում է Եղցահողի բնակիչներին․ «Դեռ սպասում ենք, տեսնենք՝ ինչ է կատարվում։ Պարեկային ծառայությունը ենթադրում է, որ երբ իրենց պետք լինի, կգան այն դիրքեր, որոնք մեր տղաները 100 տոկոսով պահում էին։ Ռուս խաղաղապահները այսօր կարող են գալ, վաղը՝ չգալ»,- ընդգծեց Արտակ Հակոբյանը՝ հավելելով՝ յուրաքանչյուր պահի սպասելի է, որ թուրքերը կգան գյուղ։

«Ինչ-որ մեկը կասկածո՞ւմ է թուրքի խաբեբայության վրա։ Սա իմ լուծելու հարցը չէ, վերադասը պետք է լուծի։ Ինչ հարց բարձրացնում ենք, վերադասն ասում է՝ քննարկման մեջ է, իրենք հետ են քաշվելու։ Բայց չի եղել նման փորձ, որ առաջինն իրենք հետ քաշվեին, նոր մենք այդ քայլը կատարեինք։ Ես երեկ նույն հարցը մեր վերադասին ու ռուս խաղաղապահներին եմ տվել՝ ինչո՞ւ ամեն անգամ մենք։ Միևնույն է, հարցս անպատասխան է մնում»,- եզրափակեց նա։