ՓՊ ընտրություններ․ ով՝ ում թեկնածուն է և ինչու փաստաբանների 50%-ը չմասնակցեց ընտրությանը

Սեպտեմբերի 14-ին տեղի ունեցավ Փաստաբանների պալատի նախագահի ընտրությունը. թեկնածուները երկուսն էին՝ Սիմոն Բաբայանն ու Գևորգ Գյոզալյանը։ Ընտրության արդյունքում նոր նախագահ ընտրվեց Սիմոն Բաբայանը։ ԼՈՒՐԵՐ․com-ի հետ զրույցում ՓՊ նորընտիր նախագահ Սիմոն Բաբայանն ընտրությունների արդյունքները գնահատեց դրական․ «Գործընկերների ակտիվ մասնակցություն ունեցանք։ Արդյունքներն էլ իմ կարծիքով համոզիչ են, փաստաբաններն ընտրեցին իրենց զարգացման և ձեռքբերումների պահպանության ուղին։ Ես որևէ մեկի թեկնածուն չեմ, իմ ընտրողի թեկնածուն եմ»,- ասաց նա։ 

Բաբայանն, անդրադառնալով Գևորգ Գյոզալյանի շնորհավորանքի մեջ հնչեցված մտքին, որտեղ վերջինս հույս էր հայտնել, որ նա ՓՊ-ն կապակուսակցականացնի, Բաբայանը հակադարձեց՝ ասելով, որ այն երբեք կուսակցականացված չի եղել և չի լինելու․ «Մենք ունենք բազմաթիվ գործընկերներ, որոնք հարում են ինչ-որ քաղաքական ուժի։ Պետք է հասկանալ, որ ՓՊ-ն նախարարություն չէ, որտեղ բոլոր փաստաբաններն ունենան ենթակայություն և պաշտոնական դիրք։ Սա հասարակական միավոր է, որը միավորում է մեր գործընկերներին։ Բազում փաստաբաններ կան, որոնք ունեն քաղաքական դիրքորոշում։ ՓՊ-ն երբեք չի եղել որևէ ուժին հարող, այն ապաքաղաքական կառույց է։ Ինչպես ՓՊ-ն իր գործունեությունն իրականացրել է, այնպես էլ շարունակելու է իրականացնել»,- նշեց Բաբայանը։ 

Ըստ ՓՊ անդամների խոսքերի՝ Գյոզալյանն ակնարկել է, որ եթե ինքը դառնա նախագահ, ապա իշխանությունները մյուսների կողմը չեն նայի։ Անդրադառնալով սրան՝ Բաբայանը ևս նշեց, որ նմանատիպ տպավորություն էր ստեղծվել բանավեճի ընթացքում, երբ Գյոզալյանը ներկայացրեց իր դիրքորոշումը, հետևաբար, դրանից կարելի է գալ նմանատիպ եզրահանգման։

Նա նշեց, որ իր պաշտոնավարումը սկսվելու է հոկտեմբերի 5-ից․ «Ես տիրապետում եմ ՓՊ խնդիրներին։ ՓՊ-ն այս տարիների ընթացքում լուրջ ձեռքբռերումներ ունի և մենք խնդիր ունենք նախևառաջ դա պահպանելու և զարգացնելու։ Ինչ վերաբերում է Փաստաբանների դպրոցի տնօրենի պաշտոնին, ապա հնարավոր չէ համատեղել երկու պաշտոնները, ուստի չեմ համատեղելու»,- ասաց Բաբայանը։ 

ԼՈՒՐԵՐ․com-ը զրուցեց նաև Գևորգ Գյոզալյանի հետ, ով չհամաձայնեց մեր այն դիտարկմանը, թե ձայների մեծամասնությամբ ՓՊ նախագահ է ընտրվել Սիմոն Բաբայանը․ «Ընտրողները մեզ մոտ 2352-ն էին, բայց մասնակցել էին 1111-ը։ Մեր խնդիրն այն էր, որ մեր խոսքը հասցնեինք պասիվ մասին, որպեսզի նրանք մասնակցեին ընտրություններին, քանի որ վերջին ընտրությունները ցույց են տվել որ մասնակցել են մոտավորապես 1000 հոգի, որոնք հիմնականում և՛ հայտարարություններ տարածողներն են, և՛ ակցիաների մասնակիցները և այլ գործընթացների մասնակիցները։ Ինձ համար անընդունելի էր, որ զանգերի միջոցով նրանց խնդրեինք մասնակցություն ունենալ, որովհետև կարծում եմ՝ եթե մարդիկ չեն ցանկանում, որ փոփոխություններ լինեն, ապա, զանգելով նրանց, ընտրատեղամաս պետք չէ բերել։ Ինձ համար շատ ուրախալի էր 144 փաստաբանի ձայնը, որոնց ոչ ոք չէր զանգել կանչել ընտրության»,- նշեց նա։

Ինչ վերաբերում է տարածված կարծիքին, թե Գյոզալյանը իշխանության թեկնածուն էր՝ վերջինս նկատեց, որ դա որևէ մեկը չի կարող ապացուցել․ «Մինչև ընտրությունները իմ հարցազրույցները նայեք և կտեսնեք իմ խիստ քննադատությունները իշխանությունների հասցեին։ Վերցրեք իմ և Սիմոն Բաբայանի հարցազրույցները և համեմատեք՝ ով է ավելի շատ քննադատել իշխանություններին»,- ասաց Գյոզալյանը։ 

Նա հույս հայտնեց, որ Բաբայանը կկարողանա իրենց համոզել, որ այս ՓՊ-ը այն պալատն է, որում պետք է իրենք գտնվեն, եթե տեսնեն՝ ՓՊ-ն քաղաքականացված է, ապա կմտածենք իրենց հաջորդ քայլի մասին, որը խոստացավ չուշացնել։ 

Թեև Գյոզալյանը ընտրությունները գնահատեց նորմալ և սպասելի արդյունքով, սակայն նկատեց՝ շատ լավ ընտրություններ չէին կարող լինել, եթե փաստաբանների 50 %-ը չէր մասնակցում։

Սոնա Հարությունյան