DHL ընկերության ինքնաթիռի կործանումը դիվերսիայով պայմանավորելու հիմքեր չկան. Լիտվայի ՊՆ

Լիտվայի պաշտպանության նախարար Լաուրինաս Կասչյունասը հայտարարել է, որ երկրի մայրաքաղաք Վիլնյուսի օդանավակայանի մոտակայքում DHL ընկերության ինքնաթիռի կործանումը դիվերսիայի վերագրելու նշաններ չեն հայտնաբերվել: Այդ մասին հայտնել է Լիտվայի ռադիոյի և հեռուստատեսության կայքը:

«Հիմնվելով ներկայում առկա տեղեկատվությանը՝ կարող ենք ասել, որ ոչինչ չի վկայում դիվերսիայի մասին: Տեսողական ուսումնասիրությունը ցույց է տվել, որ վայրէջք կատարող ինքնաթիռն արտաքին ազդեցության չի ենթարկվել: «Սև արկղեր»-ի տեղեկատվության վերլուծությունը ցույց կտա, թե ինչ կարող էր տեղի ունենալ ինքնաթիռի ներսում: Սակայն ողջ մնացած օդաչուների հետ առաջին զրույցները վկայում են, որ նրանք տագնապի զգացում չեն ունեցել ինքնաթիռում որևէ արտակարգ իրավիճակի հետ կապված»,- հայտարարել է Կասչյունասը:

Ճգնաժամային իրավիճակների կառավարման լիտվական կենտրոնի տվյալներով՝ հայտնաբերված «սև արկղեր»-ի տեղեկատվության վերծանման համար կպահանջվի մեկ ամիս: Այդ աշխատանքը կատարվելու է գերմանական լաբորատորիայում: Օդային աղետի հետաքննությամբ զբաղվում են Գերմանիայի, Իսպանիայի և Լիտվայի մասնագետները:

Գերմանիայի Լայպցիգ քաղաքից ժամանած բեռնատար ինքնաթիռը նոյեմբերի 26-ին վայրէջք կատարելիս կործանվել էր Վիլնյուսի օդանավակայանի մոտակայքում: Աղետի հետևանքով զոհվել էր Իսպանիայի քաղաքացիություն ունեցող օդաչուներից մեկը: Եվս երեք տուժածներ՝ Լիտվայի, Գերմանիայի և Իսպանիայի քաղաքացիներ, տեղափոխվել են հիվանդանոցներ: Լիտվայի ոստիկանությունն ու գլխավոր դատախազությունը նախաքննություն են սկսել։

Լիտվայի պետական ​​անվտանգության դեպարտամենտի ղեկավար Դարիուս Յաունիշկիսը հայտարարել էր, որ ահաբեկչության վարկածը չի բացառվում, սակայն դրա մասին վկայող տվյալներ դեռ չկան։ Իսկ Լիտվայի գլխավոր դատախազության դատախազ Արթուրաս Ուրբելիսը նշել է, որ առայժմ իրավիճակը վկայում է ինքնաթիռի տեխնիկական անսարքությունների կամ օդաչուների անփութության մասին։