Պետք է դուրս գանք ամեն ինչ անելու և, ըստ էության, ոչինչ չանելու իներցիոն տեղապտույտից. Փաշինյան

«Դեռևս հաղթահարված չեն համավարակի և 44-օրյա պատերազմի տնտեսական, սոցիալական և անվտանգային աղետալի հետևանքներն ու մարտահրավերները»։ Այս մասին այսօր՝ սեպտեմբերի 30-ին կառավարության նիստի մեկնարկին ասաց ՀՀ վարչապետ Նիկոլ Փաշինյանը։

Նրա խոսքով արտահերթ խորհրդարանական ընտրություններով հաղթահարվեց ներքաղաքական ճգնաժամը, և բավականին ամուր հիմքեր ստեղծվեցին համախմբման համար։

«Մեր նպատակադրումները, որոնք արտահայտված են 2022թ.-ի բյուջեում, հավակնոտ են և իրատեսական։ Մենք գիտակցում ենք, որ դրանք կյանքի կոչելու համար անհրաժեշտ են ոչ միայն տնտեսական միջամտություններ կառավարության կողմից, այլև հասարակական և մշակութային վերափոխումներ։ Առաջին հերթին կարևորում ենք պետական կառավարման համակարգի արդյունավետության բարձրացումը և աշխատանքային մշակույթի վերափոխումն ու զարգացումը։ Էական դեր ունի նաև մասնավոր հատվածի կարողությունների զարգացումը և դրան ուղղված կառավարության ջանքերը սկսել են արդյունքներ տալ»,-ասաց Նիկոլ Փաշինյանը։

Վարչապետի խոսքով կառավարությունը մտադիր է շարունակել շինարարության ոլորտում ներդրումները խթանող քաղաքականությունը՝ կիրառելով երեք հիմնական գործիք. պետական գնումների համակարգի թափանցիկություն, մրցույթի դրվող լոտերի ծավալների մեծացումը և հուսալի ընկերությունների հետ հարաբերությունների պարզեցմանն ուղղված օրենսդրական նորամուծությունները։

«Հայաստանի քաղաքացիներն ամեն օր պետք է զգան կառավարության կողմից իրականացվող միջոցառումների ազդեցությունն իրենց կյանքի վրա։ 2022-ի բյուջեն հենվում է երեք հիմնական առաջնահերթությունների վրա. Անվտանգության համակարգի բարեփոխում, ենթակառուցվածքների զարգացում, կրթության և գիտության արդիականացում։ Մեծ ուշադրություն ենք դարձնելու անվտանգության ապահովմանը, առանց որի հնարավոր չի լինի իրագործել երկարաժամկետ զարգացման նպատակները»,-նշեց Նիկոլ Փաշինյանը։