Գազաֆիկացման աշխատանքների իրականացումն ստանձնած ընկերությունների աշխատանքներում արձանագրվել են թերություններ եւ խախտումներ

ՀՀ փոխվարչապետ, տարածքային կառավարման նախարար Արմեն Գեւորգյանի մոտ դեկտեմբերի 12-ին կայացած խորհրդակցության ընթացքում քննարկվեցին Արմավիրի եւ Արագածոտնի մի շարք համայնքներում գազաֆիկացման աշխատանքների իրականացումն ստանձնած ընկերությունների գործունեությանն առնչվող հարցեր:

Մասնակցում էին ֆինանսների նախարարը, Արմավիրի եւ Արագածոտնի մարզպետները, ԱԺ "Ժառանգություն" խմբակցության պատգամավոր Ա. Բախշյանը, գյուղատնտեսության նախարարության, "Գյուղական տարածքների տնտեսական զարգացման ԾԻԳ"-ի, իրավապահ մարմինների ներկայացուցիչներ, համայնքների ղեկավարներ:

Խորհրդակցության ընթացքում նշվեց, որ Արմավիրի եւ Արագածոտնի մարզերի մի շարք համայնքներում 2004-2007թթ. գազաֆիկացման աշխատանքների իրականացումն ստանձնած "Մանշին", "Ման-Նախ" եւ "Տեդաս" ընկերությունների աշխատանքներում արձանագրվել են թերություններ եւ խախտումներ:

Իրավապահ մարմինների կողմից ձեռնարկվել են համապատասխան միջոցառումներ՝ պատճառված վնասը վերականգնելու ուղղությամբ:

Գլխավոր դատախազության ներկայացուցիչները տեղեկացրեցին, որ "Մանշին" եւ "Ման-Նախ" ընկերությունների թույլ տրված խախտումների առնչությամբ հարուցված քրեական գործերով դատաքննությունն ավարտվել է, կայացվել են վնասը վերականգնելու վերաբերյալ դատական վճիռներ: Վերոնշյալ ընկերություններից ներկայումս միայն "Մանշինն" ունի 10 մլն դրամի պարտավորություն, որը մինչեւ դեկտեմբերի 15-ը մարելու ժամանակացույց է կնքել համայնքապետերի հետ: Պարտքը չմարելու դեպքում գումարը կգանձվի դատական կարգով:

"Տեդաս" ընկերության տնօրենի դեմ հարուցված քրեական գործը գտնվում է դատաքննության փուլում, եւ դատարանը կորոշի ընկերության կողմից վերջնական պարտավորությունների չափը: Ընկերությունը գնահատված վնասի չափով գումար է փոխանցել Ոստիկանության դեպոզիտային հաշվին, եւ մեղադրանքն ապացուցվելու պարագայում գումարը կգանձվի:

Խորհրդակցության ավարտին փոխվարչապետն արձանագրեց, որ նկատված չարաշահումների բոլոր դեպքերով վնասը վերականգնելու ուղղությամբ քայլեր ձեռնարկվել են, դրանց հիմնական մասը վերականգնվել է, մյուս մասի վերականգնման գործընթացը շարունակվում է:

Արձանագրվեց սակայն, որ նշված համայնքներում (Արագածոտնի երկու եւ Արմավիրի յոթ համայնքներում) գազիֆիկացման աշխատանքներն ավարտելու համար կպահանջվի լրացուցիչ 600 մլն դրամ: Փոխվարչապետը նկատեց, որ վերջին տարիներին գազիֆիկացումն իրականացվում է "Գյուղական տարածքների տնտեսական զարգացման ԾԻԳ"-ի աջակցությամբ, եւ լրացուցիչ միջոցներ ներգրավելու պարագայում դրանք առաջնահերթ կուղղվեն այն համայնքներին, որտեղ աշխատանքներն անավարտ են մնացել: