«Սեփական բնակարանիս չորրորդ գնորդն եմ». Սոնիկ Մաղաքյան

«Ուզում եմ բոլորին տեղեկացնել մեր իրականությունում առկա բնակարանների բազմակի վաճառքի խայտառակ փաստերի մասին, ինչով զբաղվում են մեր «ամենաբարձր աթոռով» պաշտոնյաները»,– այսօր «Հայելի» մամուլի ակումբում տեղի ունեցած մամուլի ասուլիսում հայտարարեց ազատ լրագրող Սոնիկ Մաղաքյանը։

Սոնիկ Մաղաքյանը և շատ այլ բնակիչներ Բյուզանդի 21 հասցեում գտնվող շենքերի խաբված բնակիչներն են, որտեղ բազմաբնակարային շենքեր են կառուցվում, նրանք էլ համաձայն պայմանագրի՝ պետք է վերաբնակեցվեին Արամի փողոցի 72–80 նորակառույց շենքում։

Ինչպես նշեց ազատ լրագրողուհին՝ շենքի բնակարանների համար կնքվել է մոտավորապես 700 պայմանագիր. «Եւ ամեն անգամ դիմելիս ասում են, թե «կներեք, թյուրիմացություն է եղել, ձեզ նոր բնակարան կտրամադրենք»,– ասաց նա։

«Այս ամենը գլխավորում է Գագիկ Պապոյանը, ինչպես նաև շենքի բաժնետեր Սիմոն Աղալացյանը»,– ասաց Սոնիկ Մաղաքյանը։

Նա նշեց, որ ինքն իր իսկ սեփական բնակարանի չորրորդ գնորդն է, իսկ թե քանի տեր ունի բնակարանը, ոչ ոք չգիտի։

«2006թ–ից քանդել են տունս, և ես ընտանիքիս հետ միասին մինչ օրս օդում կախված եմ, ամեն անգամ ասում են նոր շենք կկառուցենք և բնակարան կտանք», բայց ինչքան պետք է փողոցում մնամ»,– նշեց ասուլիսին ներկա խաբված բնակիչներից Վահան Սարուխանյանը։