Հրապարակման հետքերով. Հանձնարարվել է քննարկել խափանման միջոցը փոխելու հարցը

«Հայկական Ժամանակ» օրաթերթի' 2011թ. դեկտեմբերի 9-ի համարում հրապարակվել էր հոդված' «Բաց նամակ պարոն նախագահին» վերտառությամբ, որտեղ Հ. Մելքոնյանը հայտնում է, որ իրեն մեղադրում են 8000 դրամ արժողությամբ գարեջուր գողանալու մեջ եւ որ ինքն արդեն 10 ամիս է, ինչ գտնվում է «Նուբարաշեն» ՔԿՀ-ում: ՀՀ գլխավոր դատախազի հանձնարարությամբ քննարկման առարկա են դարձվել բաց նամակում մատնանշված հանգամանքները:

Երեւան քաղաքի Փափազյան 22ա շենքի դիմաց գտնվող հյութերի պահոց հանդիսացող սառնարանից գողություն կատարելու դեպքի առթիվ 2011թ. հունվարի 26-ին ոստիկանության Արաբկիրի քննչական բաժնում հարուցվել է քրեական գործ' ՀՀ քրեական օրենսգրքի 177-րդ հոդվածի 2-րդ մասի 1-ին եւ 4-րդ կետերով:

Նախաքննությամբ պարզվել է, որ 2011թ. հունվարին Հ. Մելքոնյանը, նախնական համաձայնության գալով իր ծանոթ Վ. Գրիգորյանի հետ, գողություն կատարելու դիտավորությամբ, ոտքով կոտրել է Փափազյան 22ա շենքի դիմաց գտնվող հյութերի պահոց հանդիսացող սառնարանի փականը, գողացել գարեջուր եւ հյութեր' պատճառելով 8000 դրամի գույքային վնաս:

Նույն օրը Վ. Գրիգորյանը ձերբակալվել է: Վերջինիս 2011թ. հունվարի 28-ին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 1-ին եւ 4-րդ կետերով, իսկ որպես խափանման միջոց կիրառվել է կալանավորումը: Վ. Գրիգորյանն առաջադրված մեղադրանքներում իրեն մեղավոր է ճանաչել եւ տվել խոստովանական ցուցմունքներ:

Ոստիկանության Արաբկիրի բաժինը, Հ. Մելքոնյանին իր գրանցման հասցեում չհայտնաբերելով, նրա նկատմամբ հայտարարել է հետախուզում, իսկ որպես խափանման միջոց կիրառել կալանավորումը: Մի քանի օր անց' փետրվարի 19-ին, Հ. Մելքոնյանը հայտնաբերվել եւ կալանավորվել է:

2011թ. մարտի 12-ին քրեական գործը մեղադրական եզրակացությամբ ուղարկվել է Երեւան քաղաքի Արաբկիր եւ Քանաքեռ-Զեյթուն վարչական շրջանների դատախազություն, որը չի հաստատել մեղադրական եզրակացությունը, եւ 14.03.11թ. քրեական գործը վերադարձվել է ոստիկանության Արաբկիրի քննչական բաժին' լրացուցիչ քննություն կատարելու համար, որտեղից էլ' Էրեբունու քննչական բաժին, քանզի պարզվել է, որ վերը նշված մեղադրյալներից մեկի' Վ. Գրիգորյանի վերաբերյալ մեկ այլ քրեական գործ է քննվում նաեւ ոստիկանության Էրեբունու քննչական բաժնում:

Հ. Մելքոնյանը վերոհիշյալ բաց նամակում տարակուսանք էր հայտնել, թե իր քրեական գործը միացրել են անծանոթ երկու անձանց քրեական գործի հետ:

Պարզաբանում ենք, որ ոստիկանության Էրեբունու քննչական բաժնում 05.03.11թ. հարուցվել է քրեական գործ' քաղաքացու նկատմամբ մի խումբ անձանց կողմից ավազակային հարձակում կատարելու դեպքի առթիվ:

Նախաքննությամբ պարզվել է, որ ավազակային հարձակումը կատարել են Ա. Ղեւոնդյանը, Ժ. Ղուկասյանը եւ Արաբկիրի քննչական բաժնում քննվող, վերը հիշատակված քրեական գործով մեղադրյալ Վ. Գրիգորյանը: Ուստիեւ' նշված երկու քրեական գործերը ՀՀ քրեական դատավարության օրենսգրքի 28-րդ հոդվածով սահմանված կարգով միացվել են մեկ վարույթում /նույն անձի վերաբերյալ մի քանի հանցագործությունների վերաբերյալ գործերը կարող են միացվել մեկ վարույթում/ եւ նախաքննությունը շարունակվել է ոստիկանության էրեբունու բաժնում:

Արդյունքում' Ժ. Ղուկասյանին եւ Ա. Ղեւոնդյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 1-ին եւ 4-րդ կետորով, Վ. Գրիգորյանին' ՀՀ քրեական օրենսգրքի 175-րդ հոդվածի 2-րդ մասի 1-ին, 4-րդ կետերով եւ 177-րդ հոդվածի 2-րդ մասի 1-ին եւ 3-րդ կետերով, Հ. Մելքոնյանին' ՀՀ քրեական օրենսգրքի 177-րդ հոդվածի 2-րդ մասի 1-ին եւ 3-րդ կետերով:

27.06.2011թ. քրեական գործը մեղադրական եզրակացությամբ ուղարկվել է Երեւան քաղաքի Էրեբունի եւ Նուբարաշեն վարչական շրջանների ընդհանուր իրավասության դատարան' ըստ էության քննելու համար:

Քրեական գործը ներկայումս գտնվում է դատաքննության փուլում:

Դատարանում մեղադրանքը պաշտպանող դատախազին ցուցում է տրվել' դատարանում քննության առարկա դարձնել Հ. Մելքոնյանի նկատմամբ խափանման միջոց կալանավորումը փոխելու հարցը: