Սպորտի ոլորտում կապիտալ ներդրումները կաճեն, ուսուցիչների ու գիտաշխատողների աշխատավարձերը կբարձրացվեն. նախարար

«Կրթության, գիտության, մշակույթի, երիտասարդության և սպորտի ոլորտներում 2022 թվականի պետբյուջեի նախագծով նախատեսվել է ծախսերի աննախադեպ աճ»: Այս մասին ասաց ՀՀ կրթության գիտության, մշակույթի և սպորտի նախարար Վահրամ Դումանյանն ԱԺ նիստում:

«Կրթության, գիտության, մշակույթի, երիտասարդության և սպորտի ոլորտներում 2022-ի պետբյուջեի նախագծով նախատեսվել է ծախսերի աննախադեպ աճ՝ շուրջ 44 մլրդ դրամ, ինչը հիմնականում ուղղվելու է բովանդակային բարեփոխումներին, կրթական, մշակութային և մարզական հաստատությունների ենթակառուցվածքների արդիականացմանը, պետական աջակցություն ստացող շահառուների խմբերի ընդլայնմանը և գիտության զարգացմանը: Կրթության ոլորտում էական թափ կառնեն կապիտալ ծախսերը: Ընդհանուր առմամբ կառուցման, հիմնանորոգման և վերանորոգման աշխատանքներ կիրականացվեն 109 կրթական հաստատություններում, որոնցից 88-ում աշխատանքները կավարտվեն 2022 թվականին»,-ասաց Դումանյանը:

«Միայն ԿԳՄՍ նախարարության բյուջեով 2022-ին կավարտվեն կառուցման և հիմնանորոգման աշխատանքներ 56 դպրոցներում և 10 մանկապարտեզներում: Իսկ սեյսմիկ անվտանգության ծրագրի շրջանակներում հիմնանորոգման աշխատանքները կավարտվեն ևս 8 դպրոցներում: Երևան քաղաքում հիմնանորոգման աշխատանքները կավարտվեն 16 մանկապարտեզներում»,- նշեց նախարարը՝ վստահեցնելով, որ հանրակրթական ոլորտում կշարունակվեն բովանդակային բարեփոխումները:

«Շուրջ 480 ուսուցիչներ կամավոր ատեստավորման արդյունքում այսօր արդեն կստանան 30, 40 և 50 տոկոս հավելավճարներ՝ 5 տարի ժամկետով: Գործուղման բարելավված պայմաններով շուրջ 260 ուսուցիչ կգործուղվի բարձր լեռնային և սահմանամերձ համայնքներ»,- եզրափակեց Դումանյանը: