Տեղի ունեցավ ՀՀ-ում մարդկանց շահագործման (թրաֆիկինգի) հարցերով խորհրդի հերթական նիստը

ՀՀ փոխվարչապետ, Հայաստանում մարդկանց շահագործման (թրաֆիկինգի) հարցերով խորհրդի նախագահ Արմեն Գեւորգյանի մոտ դեկտեմբերի 13-ին կայացավ խորհրդի հերթական նիստը։

Քննարկվեց մարդկանց շահագործման (թրաֆիկինգի) զոհերին հատուցում տրամադրելու նպատակով պետության կողմից համապատասխան հիմնադրամի ստեղծման հարցը: Կարեւորելով նման հիմնադրամի ստեղծման անհրաժեշտությունը` խորհուրդը որոշեց, որ ՀՀ աշխատանքի եւ սոցիալական հարցերի նախարարությունը, համագործակցելով շահագրգիռ այլ մարմինների հետ, եռամսյա ժամկետում կուսումնասիրի միջազգային փորձը եւ առաջարկություններ կներկայացնի հիմնադրամի ձեւավորման սկզբունքների մասին` միաժամանակ ներկայացնելով նաեւ անհրաժեշտ իրավական ակտերի փաթեթ:

Խորհուրդն ի գիտություն ընդունեց ՀՀ սպորտի եւ երիտասարդության հարցերի նախարար Ա. Պետրոսյանի տեղեկությունը` թրաֆիկինգի կանխարգելմանն ուղղված քարոզչական միջոցառումների մասին: Նշվեց, որ պատրաստվել է սոցիալական գովազդ, որը ցուցադրվում է հանրապետական եւ մարզային սփռում ունեցող հեռուստաալիքներով:

Միգրացիոն ծառայության պետ Գ. Եգանյանը տեղեկացրեց, որ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Ա. Սաֆարյանը եւ ՀՀ մարդու իրավունքների պաշտպան Կ. Անդրեասյանը խորհրդում ընդգրկվելու համաձայնություն են հայտնել: Քննարկվեց նաեւ խորհրդի կազմում ՀՀ սփյուռքի նախարարի ու պաշտպանության փոխնախարարի ընդգրկման հարցը: Որոշվեց խորհրդի կազմը սահմանող համապատասխան որոշման մեջ փոփոխություն կատարելու առաջարկով դիմել ՀՀ վարչապետին:

Խորհուրդն ընդունեց միջգերատեսչական աշխատանքային խմբին կից երկու ենթախմբերի ստեղծման առաջարկը: Նշվեց, որ ենթախմբերից մեկը կզբաղվի ազգային ուղղորդման կարգի վերանայմամբ, իսկ մյուս ենթախումբը կուսումնասիրի ԱՄՆ պետքարտուղարության եւ Եվրոպայի խորհրդի` մարդկանց շահագործման (թրաֆիկինգի) դեմ պայքարի ԵԽ փորձագիտական խմբի (GRETA) զեկույցները եւ աշխատանքային խմբին առաջարկություններ կներկայացնի:

Խորհրդին կից միջգերատեսչական աշխատանքային խմբի ղեկավար Վ. Կաժոյանը տեղեկացրեց, որ «ՀՀ-ում 2010-2012 թվականների ընթացքում մարդկանց շահագործման (թրաֆիկինգի) դեմ պայքարի կազմակերպման» ազգային ծրագրով մինչեւ 2011թ. ավարտը կատարման ենթակա միջոցառումների իրականացման վերաբերյալ համապատասխան վերլուծություն կներկայացվի խորհրդի հաջորդ նիստին:

Խորհուրդն անդրադարձավ նաեւ երեւույթի վերաբերյալ հանրային իրազեկման հարցերին: Մասնավորապես տեղեկացվեց, որ այդ խնդիրները լուսաբանող լրագրողների համար կկազմակերպվեն դասընթացներ, սեմինարներ:

Ա. Գեւորգյանը հանձնարարեց գործնական քայլեր իրականացնել այդ ուղղությամբ` ներգրավելով նաեւ միջազգային փորձագետների:

Խորհուրդը նաեւ խրախուսական մրցանակ կսահմանի լավագույն լուսաբանման համար: Այս կապակցությամբ որոշվեց դիմել լրագրողական մասնագիտական հասարակական կազմակերպություններին` մրցանակի ստեղծման մեխանիզմների վերաբերյալ առաջարկություններ ներկայացնելու եւ 2011թ. մրցանակակիրների ընտրության համար: Նախատեսվում է, որ նման մրցանակբաշխությունը կդառնա ավանդական: