Ավելի քան 240 փախստական է զոհվել Բելառուսի հետ սահմանին․ լեհ զինվորական
Աշխարհ
Լեհ զինվորականները Բելառուսի հետ սահմանին սպանել են ավելի քան 240 միգրանտների։ Այս մասին Բելառուսի քննչական կոմիտեին հայտնել է քաղաքական ապաստան խնդրած լեհ զինծառայող Էմիլ Չեչկոն։
«Քրեական գործի քննության ընթացքում Էմիլ Չեչկոն հայտնել է, որ 2021 թվականի հունիսի 8-ից ինքը, ծառայակիցների հետ, մասնակցել է սահմանային գոտում կազմակերպված սպանություններին։ Զինծառայողի խոսքով՝ ինքը տեղյակ է ավելի քան 240 մարդու սպանության մասին»,- ասվում է գերատեսչությունների հաղորդագրության մեջ։
Չեչկոն ձերբակալվել է դեկտեմբերի 16-ին՝ սահմանային գոտում։ Նա քաղաքական ապաստան է խնդրել Մինսկից «միգրացիոն ճգնաժամի հետ կապված Լեհաստանի ներկայիս քաղաքականության հետ անհամաձայնության և փախստականների նկատմամբ անմարդկային վերաբերմունքի համար»։ Նա խոստովանել է, որ ինքը ստիպված է եղել գնդակահարել փախստականներին։
Ինչպես հայտնի է, ամռանը Բելառուսի և Լեհաստանի սահմանին մեծացել է փախստականների հոսքը Մերձավոր Արևելքից և Աֆրիկայից, որոնք փորձում են մուտք գործել Արևմտյան Եվրոպա։ Իրավիճակը սրվեց նոյեմբերի սկզբին, երբ մոտ երկու հազար մարդ հավաքվեց սահմանին։ Լեհաստանի անվտանգության ուժերը խափանեցին երկիր ներթափանցման մի քանի փորձ, այդ թվում՝ արցունքաբեր գազի կիրառմամբ։
Ամենադիտված 
Ջուր չի լինի նոյեմբերի՝ 25, 26 և 27-ին տասնյակ հասցեներում
